Hidhërimi i Papës për atentatin në Liban: të marrë fund dhuna, paqe për gjithë zonën.
Papa shpreh dhimbjen e tij të thellë për viktimat e atentatit në Beirut, që pati si
pasojë tetë të vdekur dhe më se njëqind të plagosur. Në një telegram, nënshkruar nga
sekretari i Shtetit të Vatikanit, kardinali Tarçizio Bertone, drejtuar Patrikut maronit
Bechara Boutros Raï, Papa shpreh ngushëllimet e tij për viktimat e atentatit të tmerrshëm
në Liban dhe përsërit thirrjen për paqe në të gjithë zonën. Edhe Patriku maronit e
dënon ashpër këtë ngjarje të rëndë. Nga dhuna buron vetëm vuajtje, shprehet Papa,
një muaj pas shtegtimit të tij apostolik në vendin e kedrave. Benedikti XVI i lutet
Zotit t’i japë Libanit dhe gjithë zonës, dhuratën e paqes e të pajtimit. Shumë pranë
familjeve në zi për të vdekurit e dashur, Ati i Shenjtë i lutet Zotit t’i pranojë
në dritën e Tij dhe u shpreh solidaritetin e më të ndjerë të plagosurve. E siguron,
në përfundim, mbarë popullin libanez, se lutet për paqen e dëshiruar nga të gjithë
banorët vullnemirë të këtij vendi të shqetë. Ndërsa Patriku maronit, në një komunikatë,
për të cilën flet edhe agjencia Fides, mban një qëndrim të prerë, duke e dënuar plotësisht
atentatin: “Libani, shkruan, jetonte ende në atmosferën e vizitës së Benediktit XVI.
Ky që ndodhi dje, është atentat kriminal kundër paqes dhe rezultateve aq të dëshëruara,
që pasuan vizitën e Papës”. Patriku Bechara Raï i fton të gjithë bashkatdhetarët të
bashkohen e të punojnë krah për krah për një ardhmëri paqësore në Libanin, që mbetet
tokë e Shenjtorëve, oazë e paqes dhe e shpresës. Feja jonë e shpresa jonë nuk shemben,
përfundon. Krishti i ngjallur fitoi mbi të keqen e mbi mëkatin. I lutemi për shpirtrat
e të vdekurve, për shëndetin e të plagosurve e për ngushëllimin e familjeve të prekura
nga një akt i tillë kriminal. Vetëm Ai është ngushëlluesi i madh, i vërtetë.