Ռուսիա «Արաբական Գարնան» Յաջորդելիք «Արաբական Ամառ»-էն Կը Զգուշացնէ. «Սուրիական Ընդդիմութիւնը
Քաղաքական Ուժ Մը Չէ, Որուն Հետ Կարելի Ըլլայ Բանակցիլ» Կ՛ըսէ Կրուշքօ:
Ռուսիոյ արտաքին գործոց փոխնախարար Ալեքսանտր Կրուշքօ ՕԹԱՆ-ի խորհրդարանական վեհաժողովէն
պատուիրակութեան մը հետ հանդիպումի ընթացքին յայտնեց, որ «սուրիական ընդդիմութիւնը առայժմ
չի կրնար քաղաքական ուժ մը ըլլալ, որուն հետ կարելի է բանակցիլ»` նշելով, որ «սուրիական
ընդդիմութիւնը անկարող է իր շարքերը միաւորել, որպէսզի վերածուի քաղաքական ուժի մը, որուն
հետ կարելի ըլլայ բանակցիլ»: Կրուշքօ արեւմտեան երկիրներուն կոչ ուղղեց` սուրիական
ընդդիմութիւնը իշխանութեան հետ երկխօսութեան մղելու: Ան վերահաստատեց արտաքին միջամտութիւնները
մերժող Մոսկուայի կեցուածքը` նշելով, որ «Սուրիոյ տագնապը սուրիացիներուն վերաբերող հարց
մըն է»: Ռուսիոյ փոխվարչապետ Տմիթրի Ռոկոզին իր կարգին պատուիրակութեան յայտնեց, որ
«Ռուսիա Սուրիոյ զինուորական թեքնիք գործակցութեան ծիրին մէջ միջազգային պատժամիջոցներով
արգիլուած որեւէ բան չի մատակարարեր»: «Սուրիա արտածուած ռուսական բոլոր զէնքերը ինքնապաշտպանութեան
զէնքեր են, եւ նախ եւ առաջ հակաօդային զէնքեր», ըսաւ ան` աւելցնելով, որ «ինչպէ՞ս կարելի
է երեւակայել, որ հակաօդային համակարգ մը քաղաքացիական պատերազմի մը մէջ քաղաքային բնակչութեան
դէմ կրնայ գործածուիլ: Չկայ առասպելագիր մը, որ կրնայ այդպիսի դիպաշար մը ստեղծել, որովհետեւ
այդ մէկը անկարելի հարց է»: Ռոկոզին նաեւ իր խօսքը աւարտեց հետեւեալ կոչով. «Դադրեցուցէք
«Արաբական Գարնան» աջակցութիւնը, որովհետեւ անոր աւարտը վատ է եւ «Արաբական Գարնան» պիտի
յաջորդէ արաբական տաք ամառ մը, որ ոչ ոք գոհ պիտի ձգէ»: Սուրիոյ արտաքին գործոց նախարարութիւնը
յայտարարեց, որ ՄԱԿ-ի եւ Արաբական լիկայի Սուրիոյ հարցով յատուկ պատուիրակ Լախտար Իպրահիմի
շաբաթ օր Դամասկոս պիտի այցելէ: Նախարարութիւնը նաեւ ՄԱԿ-ի ընդհանուր քարտուղար Պան Քի
Մունի եւ Ապահովութեան խորհուրդի կարգ մը երկիրներու ահաբեկչութեան աջակցութեան վերաբերեալ
նամակներ ուղարկեց: