Solidaritet i ipeshkvijve evropianë kundër akteve të urrejtjes për fenë në Rusi
Ipeshkvijtë evropianë i shprehën Patriarkanës së Moskës solidaritetin, por edhe shqetësimin
e tyre, për një sërë aktesh vandale e sulmesh, që po vënë në shënjestër kishat ortodokse
ruse gjatë vitit të fundit. Në një letër, drejtuar metropolitit Hilarion, kryetar
i Departamentit të Patriarkanës së Moskës për marrëdhëniet me jashtë, kryesia e Këshillit
të konferencave ipeshkvnore evropiane(Ccee) shpreh shqetësimin për manifestimet e
shumta diskriminuese, gjithnjë në rritje, vërejtur posaçërisht muajt e fundit, kundër
Kishës, sidomos në Federatën Ruse. Vërehet, njofton agjencia Sir, se këtë vit janë
shpeshuar aktet vandale, që kanë dëmtuar rëndë kisha e simbole kishtare në Federatën
Ruse. Kujtojmë këtu thyerjen e kryqeve, si raprezalje nga grupi punk feminist Pussy
Riot i cili, aty nga fundi i shkurtit, dha, në Katedralen e Krishtit Shëlbues, një
shfaqje, për t’i kërkuar Virgjërës Mari hirin ta çlironte vendin nga mandati i tretë
presidencial i Vladimir Putinit. Akti i fundit i vandalizmit u krye në Zvicër,
e pikërisht në Gjenevë ku, natën ndërmjet së dielës 14 e së hënës, 15 tetor, fasada
e katedrales së Naltimit të Kryqit në dioqezën e Evropës perëndimore të Kishës ruse,
jashtë kufijve të vendit, u zhgarravit me bojë vaji të kuqe. E ndërtuar 150 vjet
më parë, pëson për herë të parë një sulm të tillë, ngjyrosur me ngjyrën e revolucionit.
Në letrën drejtuar Metropolitit Hilarion, ipeshkvijtë evropianë flasin për manifestime
në rritje të urrejtjes kundër krishterimit në Federatën Ruse. E shtojnë: “Kryesia
e Këshillit të konferencave ipeshkvnore evropiane (Ccee), nuk e pranon prirjen për
t’i konsideruar si forma të lirisë artistike e asaj të shprehjes, akte të përdorimit
a të manipulimit të fesë me qëllime provokuese, për të vënë në rrezik paqen fetare
ose për t’i fryrë zjarrit të urrejtjes kundër pranisë fetare në jetën publike”.