Իտալիոյ Մէջ Ապրիլ 24ը Հայոց Ցեղասպանութիւնը Յիշատակելու Օր Դարձնելու Ջանքեր.
Հայաստան այցելող (12 Հոկտեմբերին) Իտալիոյ Ծերակոյտի եւ Խորհրդարանի Իտալիա-Հայաստան
բարեկամութեան խմբակի անդամները հանդիպում մը ունեցած են ՀՀ Ազգային ժողովի նախագահ Յովիկ
Աբրահամեանի հետ: Իտալիոյ Ծերակոյտին եւ Խորհրդարանին մէջ գործող հիմնական խմբակցութիւններէն
ներկայացուցիչներ ունեցող սոյն խմբակի ղեկավար Սանտրա Ծամփա բարձր գնահատած է հայ ժողովուրդի
ներդրումը եւրոպական եւ մասնաւորապէս՝ իտալական մշակոյթի, գիտութեան, տնտեսութեան եւ
այլ ոլորտներու մէջ: «Այժմ Եւրոպան պէտք է վերադարձնէ ձեզի այն, ինչ դուք երկար տարիներ
ներդրած էք Եւրոպայի մէջ, եւ պէտք է նեցուկ կանգնի ձեր պետութեան կայացման», նշած է ան: Ծամփա
աւելցուցած է, թէ Իտալիոյ Խորհրդարանին մէջ շրջանառութեան մէջ դրուած է օրինագիծ մը,
որ կը պահանջէ Ապրիլ 24ը Իտալիոյ մէջ պետականօրէն համարել Հայոց Ցեղասպանութեան Զոհերու
յիշատակի օր: Յիշեցնենք, թէ իտալացի պատգամաւորները վերջերս ձախողութեան մատնած էին
Իտալիոյ Խորհրդարանին մէջ շրջանառութեան մէջ դրուած Լեռնային Ղարաբաղի վերաբերեալ Ատրպէյճանի
տեսակէտները արտայայտող եւ խիստ միակողմանի բնոյթ կրող բանաձեւը: