«Կրօնական Զբօսաշրջութեան և Ուխտի աճման Միութիւն»ը հաստատուած է Լիբանանի Պատրիարքներու
Խորհուրդի կողմէ: Անոր նպատակը կրնանք հասկնալ իր վերնագրէն: Լիբանանի 21 սրբավայրերու
ներկայացուցիչ՝ կրօնաւոր կրօնաւորուհիներ, արդէն 7 տարիէ ի վեր ժողովներ կը գումարեն
այս սրբատեղիներէն մէկուն մէջ: 12/10/2012-ին, 30-րդ ժողովը կայացաւ Քֆիֆանի ուխտավայրին
մէջ: Ընդհանրապէս Զմմառի Վանքի Ընդհանուր քարտուղարը կը մասնակցի սոյն ժողովներուն: Միութեան
տնօրէնը՝ Հայր Խալիլ Ալուանն է, Լիբանանցի առաքելութեանց Միաբանութենէն: Այս Միութիւնը
ցարդ 2 համագումար կատարած է գործակցաբար Զբօսաշրջութեան Նախարարութեան հետ: Պատրիարքներու
Խորհուրդի Սիւնհոդոսը եւս այս միութեան կը յանձնէ կրօնքներու երկխօսութեան ձեռնարկները:
«Լիբանանի Սրբավայրերը, Ճանապարհդ դէպի Քրիստոս» արաբերէն լեզուով առաջին գիրքը,
պտուղն է այս Միութեան աշխատանքներուն: Ան նկարազարդ և գունաւոր 245 էջանոց հատոր մըն
է, որ լոյս տեսաւ այս տարի 10.500 տպաքանակով: Ան կ'ընդգրկէ Լիբանանի 21 սրբավայրերու
մասին օգտակար տեղեկութիւններ: Նշելի է թէ Զմմառի Վանքը այս 21 սրբավայրերու 4-րդ տեղը
կը գրաւէ, իր հնութեան կարեւորութեամբ: