Ikona shqiptare të shekujve 14-të e 18-të ekspozohen në një nga sallat e Muzeut Qendror
të Kulturës Antike dhe Artit Mesjetar rus në Moskë "Andrei Rubljov". Ekspozita e ikonografisë
shqiptare u hap më datën 10 tetor. Në këtë ekspozitë prezantohen ikona të shekujve
14 - 18-të , marrë nga koleksioni i ikonave të Muzeut Kombëtar të Artit Mesjetar të
Korçës. Ikonat përfaqësojnë punime të Nikolla Onufrit, Vëllezërve Zografi, të David
Selenicës, të Jeromonakut, anonime etj. Spikasnin ikonat "Pagëzimi i Krishtit,
"Shën Maria me Shenjtorë", "Shën Maria me Krishtin", "Johan Theologu",
"Ngjallja e Llazarit", "Prekja e Thomait", "Dyert e Bukura" etj. Në
ceremoninë e organizuar në kupolën e Kishës mesjetare të muzeut "Andrej Rublov" përshëndetën
të pranishmit Drejtori i Përgjithshëm i Muzeut të Artit Mesjetar rus, "Andrej Rublov",
Grigori Popov, Drejtoresha e Muzeut Kombëtar të Artit Mesjetar të Korçës, Tatjana
Caca, etj Folësit në këtë ceremoni vunë në dukje vlerat e veçanta historike, kulturore,
artistike dhe fetare të ikonografisë shqiptare. Përfaqësuesit e institucioneve ruse,
përshëndetën hapjen e kësaj ekspozite të veçantë në Moskë, e cila i bën më të prekshme
vlerat kulturore, artistike dhe fetare të popullit shqiptar. Kjo ekspozitë, sipas
tyre, transmeton mesazhet e kohës, por me ngjyra shqiptare. Ky aktivitet zhvillohet
në kuadër të Ditëve të Kulturës Shqiptare në Rusi dhe të 100- vjetorit të Shpalljes
së Pavarësisë së Shqipërisë. Ekspozita e ikonografisë shqiptare në Moskë do të qëndrojë
e hapur për vizitorët rusë deri në 9 nëntor. Me pas, ajo do të transferohet në qytetin
e tretë më të madh të Rusisë, Nizhni Novgorod, ku do të qëndrojë e hapur deri më 11
dhjetor 2012. (nga ATSH-aj)