Prej 48 vitesh, 15 tetori shënon në mbarë botën ditën simbol të personave që nuk shikojnë,
e njohur si Dita Ndërkombëtare e Shkopit të Bardhë. Në këtë ditë në qendër të vëmendjes
janë përpjekjet e personave të verbër për përmirësimin e standardeve të tyre në vendet
ku jetojnë, si dhe një mundësi sensibilizimi për shoqërinë në respektimin dhe integrimin
e personave të verbër. Sipas statistikave, në vendin tonë ka më shumë se 10
mijë persona të verbër dhe me shikim të pjesshëm. Vitet e fundit, Shoqata e të
Verbërve të Shqipërisë, vlerëson se ka një rritje të ndjeshmërisë së shoqërisë dhe
të institucioneve shtetërore ndaj personave të verbër, por arritja e standardeve bashkëkohore
që rekomandojnë dokumentet ndërkombëtarë për të drejtat e Personave me Aftësi të Kufizuar
kërkon më shumë punë. Sipas kësaj shoqate, problematika të tilla si krijimi
i kushteve për lëvizjen autonome të personave të verbër në rrugë, janë ende të brishta
në shoqërinë tonë. Për të përmbushur këtë 'komoditet', shoqata organizon trajnime
për përdorimin e shkopit të bardhë për komunitetin e njerëzve me aftësi të kufizuara
të shikimit. Në vendin tonë sipas të dhënave të kësaj shoqate, prej krijimit
të saj e deri më sot, personat që nuk shikojnë kanë zhvilluar më tepër profesionet
e niveleve intelektuale lidhur kjo dhe me rritjen e shkallës së arsimimit. Në vitin
2007 sipas analizave rezulton se 26.9 % e anëtarëve të verbër janë në moshë pune.
Nga të dhënat rezulton se pjesa më e madhe e qytetarëve të verbër janë të moshës së
tretë, kjo dhe për faktin se problemet e shikimit me kalimin e viteve vijnë dhe rëndohen
dhe bëjnë që numri i të verbërve të këtyre moshave të jetë më i madh. Grupmosha
e aftë për punë e kategorisë së qytetarëve të verbër rezulton në pjesën më të madhe
e dominuar nga meshkujt me 56.2% dhe me pas femrat me 43.8%. Shkopi i bardhë
është krijuar në vitin 1912 nga artisti James Biggs nga Bristoli. Pas një aksidenti,
i cili i mori shikimin, artisti duhej të ripërshtatej me ambientin. Duke ndjerë kërcënimin
nga mjetet e tjera lëvizëse rreth e rrotull shtëpisë së vet, Biggs vendosi ta lyente
shkopin e tij lëvizës me ngjyrë të bardhë dhe ta bënte veten më të dukshëm në rrugë.
Jo më shumë se 10 vjet më vonë shkopi i bardhë ishte prezent në shoqërinë e asaj kohe.
Në shkurt të vitit 1931, Guilly d'Herbmont lançoi një skemë për një lëvizje kombëtare
të personave të verbër në Francë. Kjo fushatë u raportua edhe në gazetat britanike,
e cila udhëhiqte një skemë të ngjashme të sponsorizuar nga klubet e llotarisë.
Në maj të vitit 1931, BBC sugjeroi në radion e vet se individët e verbër duhet të
sigurohen me një shkop të bardhë, i cili do të mund të njihet në mënyrë universale,
si një simbol i cili tregon se dikush është i verbër ose me shikim të pjesshëm. Ndërsa
në Amerikën Veriore, celebrimi i shkopit të bardhë iu atribua Klubit Ndërkombëtar
të Luanëve. Në vitin 1930, një anëtar i Klubit të Luanëve, vëzhgonte se si një person
i verbër priste të kalonte rrugën me një shkop të zi në dorë. Me mendimin që shkopi
i zi bëhej i padukshëm për personat e tjerë, ata vendosën ta lyenin atë me ngjyrë
të bardhë për të rritur dallueshmërinë e tij nga motoristët. Më pas, Presidenti
i SHBA, Lyndon S. Johnson, u interesua dhe e proklamoi 15 Tetorin si Ditë e Shkopit
të Bardhë. Në 6 Tetor të vitit1964, një rezolutë e përbashkët e Kongresit e deklaroi
ligjërisht këtë ditë. Nisur nga kjo ngjarje, në të gjithë botën 15 Tetori kremtohet
si dita simbol për pavarësi, integrim dhe autonomi të personave të verbër. (nga ATSH-ja)