Shenjtorët e javës që vjen, sipas kalendarit kishtar
Në të dielën e 28-të të vitit kishtar, Kisha Katolike kremton edhe festën e
shën Kalistit I, papë e martir. Në Ungjill, Jezu Krishti i thotë të riut që e pyet,
të shesë pasurinë e vet e t’ua shpërndajë të varfërve. Pasuria në vetvete nuk është
diçka e keqe, janë zotëruesit e saj, që duhen kritikuar. Pasuria është e destinuar
nga Zoti për t’u përdorur sipas nevojave e jo thjesht për t’u grumbulluar. Prandaj,
do të jetë e vështirë për ata, që s’mund të ndahen prej saj, të hyjnë në Mbretërinë
e Qiellit.
Të hënën, më 15 tetor, kremtohet një shenjte e madhe e Kishës,
karmelitania e zbathur, shën Tereza e Avilës, virgjër e dijetare. “Qoftë bekuar emri
i Zotit, sot e përgjithmonë”, thonë leximet biblike. Shën Pali Apostull na kujton
se Zoti do prej nesh t’i përgjigjemi lirisht, ta pranojmë pa kushte. Po të hënën,
kremtohen edhe shën Barseni e shën Tekla.
Ditën e martë, më 16 tetor,
bie festa liturgjike e shën Edvigjes, dukeshë e Polonisë, rregulltare; e shën Margaritës
Alakok, virgjër dhe e shën Gerard Majelës. Në këtë ditë meditojmë se nuk ka kuptim
të tregohemi ashtu si nuk jemi. Zoti na sheh zemrën e veprat e fesë.
Më
17 tetor, Kisha Katolike kremton shën Injacin e Antiokisë, ipeshkëv e martir.
Përvoja e tij na mëson se kush ndjek Zotin, do të ketë dritë në jetën e vet. Ka dy
mënyra sjelljeje: siç na thotë instinkti i pakontrolluar dhe siç na thotë Shpirti
i Hyjit. E para shqetësohet për dukjen e jashtme, e dyta, për dashurinë e Krishtit.
Shën
Luka ungjilltar festohet ditën e enjte, më 18 tetor. Mjek, pajtor i artistëve,
shën Luka, me Ungjillin e tij, i thur lavde Zotit në Mbretërinë Qiellore, ashtu siç
bëjnë të gjithë shenjtorët me jetën e tyre. Ai mund të quhet teologu i misionit, sepse
i jep rëndësi të veçantë shpalljes së Lajmit të Mirë të Krishtit.
Të premten,
më 19 tetor, përkujtohen shën Gjoni i Brebëfit e shën Isak Jogues, meshtarë jezuitë,
martirë kanadezë, si edhe shën Pali i Kryqit, themelues i Pasionistëve. Koherenca
ndërmjet jetës e fesë është karakteristika themelore, që Jezusi u kërkon atyre, që
e ndjekin. Për këtë u dalluan shenjtorët e kremtuar në këtë ditë.
Shenjtorët,
që kremtohen të shtunën, më 20 tetor, dëshmojnë se është dhurata e Shpirtit
Shenjt, që na bën të aftë ta njohim vërtet Jezu Krishtin. Nuk mjafton ta kërkojmë
pa fund, nëse na mungon ndihma e Tij. Në këtë ditë bie festa e shën Vitalit, shën
Adelinës e shën Maria Bertila Boskardìn.
Të dielën e ardhshme, e 29-ta
e vitit kishtar, kremtohet shën Ursula, por edhe Dita e 86-të Misionare Botërore.
Papa Benedikti XVI do të shpallë shtatë shenjtorë të rinj të Kishës Katolike. Ata
janë: Xhakomo Berthië, Pedro Kalungsod, Gjon Maria Piamarta, Maria e Malit Karmel,
Maria Ana Kope, Katerina Tekakuita dhe Ana Shafer. Po më 21 tetor, shkodranët kremtojnë
Pajtoren e tyre Qiellore, Zojën e Shkodrës.