Në Sinod: Imzot Mihalik: më shumë forcë për ekumenizmin.
Zemra e ungjillëzimit është takimi i njeriut me Jezu Krishtin. Kjo nënvizohet fort
në Instrumentum Laboris (Plani i punës), dokument programatik i Sinodit për Ungjillëzimin
e Ri. Feja e krishterë mund të transmetohet vetëm përmes lidhjes personale me Krishtin
e ngjallur, ushqyer nga lutja e nga pjesëmarrja në sakramente. Është kjo detyra parësore
e të krishterëve të të gjitha konfesioneve. E pohon me forcë edhe imzot Jozef Mihalik,
kryetar i Konferencës ipeshkvnore polake, në mikrofonin tonë: Përgjigje:
- Premisat e ungjillëzimit të ri varen nga ne, domethënë nga bindja se
Ungjilli ka vlerë jetike për ne, i jep kuptim jetës sonë e prandaj edhe dëshirojmë
ta ndajmë me të tjerët. Duhet të mendojmë mirë, para se të qahemi e të ankohemi se
Ungjilli nuk u intereson të tjerëve.... Nëse ne vetë, të parët, nuk interesohemi për
Ungjillin, në se Fjala e Jezusit nuk na e ‘përvëlon’ shpirtin, mungon kushti themelor
për të prekur zemrën e të afërmit. Por nuk duhet harruar, sidomos, se ungjillëzimi
është vepër e Shpirtit Shenjt.
Pyetje: - A ka rëndësi për ungjillëzimin
e ri, dialogu ekumenik? E bëjmë këtë pyetje, sepse përçarja e të krishterëve na duket
si kundërdëshmi....
Përgjigje: - Edhe Kishat e tjera interesohen
të bashkëpunojnë për t’u bërë ballë sfidave me të cilat Kisha ndeshet çdo ditë. Në
Poloni, disa javë më parë, patëm një mik të nderuar, Patrikun e Moskës dhe të të
gjithë Rusive, Kirill, me të cilin u takuam dhe nënshkruam një dokument. Përmes tij
Polonia e Rusia i kërkuan falje njëra-tjetrës. Duam të punojmë së bashku për kumtimin
e Ungjillit, duke përballuar krah për krah pengesa e sfida; duam të impenjohemi për
mbrojtjen e jetës, të familjes e edhe për të favorizuar praninë e Zotit në jetën shoqërore,
publike, politike.
Pyetje: - Sipas jush, si është e mundur që zjarri
i fesë ta ngrohë më pak pikërisht Evropën e krishterë?!
Përgjigje:
- Sot në Evropë mungon kultura e përgjithshme, kultura me frymë krijuese,
që i edukon njerëzit me të bukurën, me të mirën. Sot njerëzit rendin kryesisht pas
parasë, u interesojnë tregu, fitimi, karriera.... e kjo është njerëzore, por duhet
të përkojë me vlerat shpirtërore, të pajtohet me ndërgjegjen, të mos i kundërvihet
parimeve themelore etike. Në se mungojnë pikat e referimit, që lidhen me vlerat
më të larta, njeriu gjymtohet shpirtërisht.
Pyetje: - Frontet e
ungjillëzimit të ri në Poloni?
Përgjigje: - Përpiqemi t’i
qëndrojmë besnikë bazës, Zbulesës, Shkrimit Shenjt, traditës, në kushte të reja, pak
a shumë të ngjashme me ato, që jetohen në pjesën tjetër të Evropës. Ati i Shenjtë,
në librin e tij intervistë thekson: gjërat e vërteta janë të thjeshta e gjërat e thjeshta
janë të vërteta. Realitetet e fesë mësohen që në fëmijëri e, në rritje, pastaj, bëhen
pikëmbështetje për të ecur drejt në rrugën e gjatë të jetës: bukuria e fesë, devocioni
marian, katekizmi në shkollë, mesha e së dielës... Duhet ta ruajmë besnikërinë ndaj
këtyre vlerave, bazë për dialogun me botën moderne. E pastaj, duhen zgjuar shekullarët
tanë: shekullarë që premtojnë shumë. Në 20 vjetët e fundit është rritur gjithnjë më
shumë impenjimi i laikëve, ashtu si edhe vetëdija e pergjegjësisë për ta dëshmuar
Krishtin në gjirin e shoqërisë.