Սուրիական Օդանաւի Հարցը "Ռուսիա – Թուրքիա" Լարուածութիւն Կը Ստեղծէ. Դամասկոս Անգարան
Օդահէնութեամբ Կ՛ամբաստանէ, Իսկ Մոսկուա Անգարայէն Բացատրութիւն Կը Պահանջէ:
Թրքական կործանիչ մը չորեքշաբթի գիշեր Մոսկուա-Դամասկոս թռիչք կատարող սուրիական օդանաւային
ընկերութեան օդանաւը ստիպած էր քննութեան համար էջք կատարել Անգարայի օդակայանը: Ռուսիոյ
արտաքին գործոց նախարարութեան բանբեր Ալեքսանտր Լուքաշեւիչ հաղորդագրութիւն մը հրապարակելով
յայտնեց, որ Թուրքիա վտանգած է նշեալ օդանաւին մէջ գտնուող ճամբորդներուն, ներառեալ`
Ռուսիոյ 17 քաղաքացիներու կեանքը: Ան ըսած է, որ թրքական կողմը Անգարայի մէջ Ռուսիոյ
դեսպանատան չէ տեղեկացուցած, որ ուղեւորներու շարքին Ռուսիոյ քաղաքացիներ կան: Ռուսիոյ
արտաքին գործոց նախարարը այդ մասին տեղեկացած է ելեկտրոնային լրատուամիջոցներէն: «Անգարա
խախտած է երկկողմանի համաձայնութիւնը եւ ռուս դիւանագէտներուն չէ արտօնած հանդիպիլ օդանաւին
մէջ գտնուող Ռուսիոյ քաղաքացիներուն հետ: Մոսկուա այդ արարքին վերաբերեալ թրքական իշխանութիւններէն
բացատրութիւն կը պահանջէ եւ անընդունելի կը նկատէ նման միջադէպերու կրկնութիւնը», ըսած
է Ռուսիոյ արտաքին գործոց նախարարութեան բանբերը: Լուքաշեւիչ յայտնած է, որ Անգարայի
մէջ Ռուսիոյ դեսպանատունը պահանջած է Ռուսիոյ քաղաքացիներուն հետ հանդիպիլ: Օդակայան
ուղարկուած են դեսպանատան աշխատողներ եւ բժիշկ մը, սակայն թրքական կողմը, առանց պատճառաբանութեան,
արգիլած է դիւանագէտներու ռուս քաղաքացիներուն հետ հանդիպումը: Ռուսիոյ քաղաքացիներուն
ճաշ չեն տրամադրած եւ թոյլ չեն տուած օդակայանի տարածք դուրս գալ: «Ռուսական կողմը
նման գործողութիւններու համար բացատրութիւն կը պահանջէ թրքական իշխանութիւններէն, ինչպէս
նաեւ այսպիսի միջադէպերու ապագային կրկնութիւնը կանխարգիլելու համար միջոցառումներու
որդեգրումը կը պահանջէ», յայտարարած է ան: Ռուսիոյ զէնքի արտածման մարզէն աղբիւր մը
իր կարգին հերքեց, թէ սուրիական օդանաւին վրայ զէնքեր կամ զինուորական սարքեր գոյութիւն
ունեցած են: Նշենք, որ Թուրքիոյ արտաքին գործոց նախարար Ահմեթ Տաւութօղլու յայտարարած
էր, որ սուրիական օդանաւը «ոչ քաղաքային» սարքեր կը փոխադրէր: Միւս կողմէ, Սուրիոյ
նախագահ Պաշշար Ասատ թրքական «Այտընլըք» օրաթերթին հետ երէկ լոյս տեսած հարցազրոյցի մը
ընթացքին ըսաւ. «Մենք որեւէ խնդիր չունինք թուրք ժողովուրդին եւ զինուորականութեան հետ:
Սուրիան թշնամական կեցուածք չունի Թուրքիոյ նկատմամբ եւ միշտ եղբայրաբար մօտեցած է: Մենք
խնդիրներ ունինք թրքական կառավարութեան հետ` այն կեցուածքին համար, որուն պատճառով ալ
սահմանին վրայ խնդիրներ կ՛ունենանք»: