Papa: Etërit konciliarë nuk deshën të krijojnë një Kishë të re, por ta përtërinin
atë, në vazhdimësi me të kaluarën
Gazeta e Vatikanit “L’Osservatore Romano” boton një numër të veçantë, me rastin e
50-vjetorit të hapjes së Koncilit II të Vatikanit. 40 mijë kopje me tregime të ndjera
të epokës konciliare, me detaje kronike pak të njohura e me fotografi të rralla. Numri
i veçantë fillon me një tekst të Papës Benedikti XVI, i cili mori pjesë në Koncil
si teolog. Etërit konciliarë, shkruan Ati i Shenjtë, “nuk mund e nuk donin të
krijonin ndonjë fe të ndryshme, ose ndonjë Kishë të re, por t’i kuptonin të dyja me
thellë e pastaj, t’i rinovonin vërtet”. Ata, që e interpretojnë Koncilin si shkëputje
të plotë nga e kaluara, gabojnë rëndë, nënvizon Benedikti XVI, i cili kujton emocionet
që pati, si teolog i ri, i pranishëm në punimet e Koncilit: “Më bëri kaq shumë
përshtypje kur pashë të hynin ipeshkvijtë e ardhur nga e gjithë bota, nga të gjithë
popujt e racat: një imazh i Kishës së Jezu Krishtit, që përqafon gjithë botën, në
të cilën, të gjithë popujt e botës ta ndjejnë veten të bashkuar, në paqe. Ishte çast
aspiratash të mëdha. Gjëra të mëdha duhej të ndodhnin”. Krishterimi, që kishte
ndërtuar e plazmuar bota perëndimore, vazhdon Benedikti XVI, dukej sikur po e humbiste
vazhdimisht forcën. Dukej i lodhur, sikur e ardhmja përcaktohej nga fuqi të tjera
shpirtërore, kishte nevojë të përtërihej. E ipeshkvijtë, kujton akoma Papa, erdhën
në Koncil me ide të ndryshme, por përparësitë ishin të përbashkëta: tema e ekleziologjisë,
rivlerësimi i shërbimit ipeshkvnor në kontekstin e primatit papnor, cikli tematik
Zbulimi – Shkrimi i Shenjtë, Tradita – Magjisteri, risitë liturgjike – tepër të rëndësishme,
sidomos për ipeshkvijtë e Evropës Qendrore – por edhe ekumenizmi, argument shumë i
ndjerë nga ipeshkvijtë gjermanë. “Ndër francezët – sjell ndërmend Benedikti XVI
– u vu gjithnjë e më shumë në plan të parë, tema e marrëdhënieve ndërmjet Kishës dhe
botës moderne, apo punimet rreth së ashtuquajturës ‘Skema XIII’, nga e cila lindi
Kushtetuta baritore mbi Kishën në botën bashkohore”. “Këtu prekej pika, që kishte
zgjuar më tepër aspetativa në Koncil. Kisha, e cila në epokën baroke e kishte, si
të thuash, plazmuar botën, duke filluar nga shekulli XIX, po hynte gjithnjë e më shumë
në marrëdhënie negative me epokën moderne. A mos vallë gjërat duhej të mbeteshin kështu?
– pyet Papa në artikullin e “L’Osservatore Romano”-s. A s’mundej Kisha të bënte një
hap pozitiv në kohët e reja?”. Takimi me temat e mëdha të epokës bashkohore
nuk u bë përmes Kushtetutës baritore, kujton Ati i Shenjtë, por përmes dy dokumenteve
më të vogla: Deklaratës për lirinë fetare, hartuar sidomos me kontributin e episkopatit
amerikan, dhe Deklaratës “Nostra Aetate”, mbi marrëdhëniet e Kishës me fetë jo të
krishtera. Teksti i parë pohonte se njeriu është i lirë të zgjedhë e të praktikojë
fenë që do e ta ndryshojë atë, ndërsa i dyti lindi fillimisht si deklaratë për marrëdhëniet
ndërmjet Kishës e hebraizmit, e nevojshme pas tmerreve të Shoah-ut, por më pas, etërit
konciliarë shtuan pjesë për Islamin, budizmin e për dialogun e bashkëpunimin ndërmjet
feve. Një mungesë në këtë tekst, vëren Benedikti XVI, është injorimi i formave të
sëmura të fesë, që nga pikpamja historike e teologjike, kanë ndikim të madh. Ai i
Shenjtë e përfundon tekstin e tij duke theksuar se nëse në fillim të Koncilit II të
Vatikanit, mbizotëronin episkopatet e Evropës Qendrore, gjatë fazave të ndryshme bashkëpunimi
u zgjerua gjithnjë e më shumë: “Ipeshkvijtë e ndjenin veten nxënës në shkollën
e Shpirtit Shenjt e në shkollën e bashkëpunimit të ndërsjelltë, por pikërisht në këtë
mënyrë, e kuptonin se ishin shërbëtorë të Fjalës së Zotit, që jetojnë e veprojnë me
fe”.