Nesër, Çmimi Nobel për letërsinë. Del në plan të parë, hungarezi Peter Nadas.
Mund të jetë Peter Nadas, 70 vjeç, një nga shkrimtarët më të rëndësishëm hungarezë,
e papritura e çastit të fundit nesër, në shpalljen e Çmimit Nobel për letërsinë. Mund
t’ua kalojë, kështu, autorëve, emrat e të cilëve përmenden prej javësh nga dashamirët
në mbarë botën. Kalojnë gojë më gojë emrat e japonezit Haruki Murakami, kinezit Mo
Yan e irlandezit William Trevor. Flitet edhe për një grua, për një autor veriamerikan,
për nigerianin Chinua Achebe, sirianin Adonis e algjerianen Assia Djebar. Blogu
The Literary Saloon, i cili në dhjetvjeçarin e fundit i ka rënë shpesh në të emrit
të fituesit, nënvizon keniotin Ngugi wa Thiong'o dhe izraelitin Amos Oz. Në shtypin
e Stokholmit (rimarrë nga ai aziatik) kujtohet edhe Mo Yan, si sinjal i pajtimit me
Kinën, pas Nobelit të vitit 2000, kur Çmimi iu dorëzua Gao Xingjian, i padëshiruar
në atdhe, prej kohe nënshtetas francez. Ndërmjet italianëve, Umberto Eco dhe Dacia
Maraini. Emri i nobelistit më të pritur e më të diskutuar, do të shpallet nesër,
më 11 tetor, në orën 13.00, në Stokholm, nga Peter Englund, sekretar i përhershëm
i Akademisë Mbretërore Suedeze, i cili ka nderin ta kryesojë çdo vit këtë ceremoni,
duke shpallur një nga emrat e listës, përfolur vite me radhë, në pritje të Çmimit
të madh.Kujtojmë se kandidati i parë shqiptar për çmimin Nobel ishte Atë Gjergj Fishta,
i fundit, Ismail Kadare. E kujtojmë edhe se ky çmim u jepet shkrimtarëve sa janë gjallë.
Prej këndej, shumë të vdekur të lavdishëm nuk u panë kurrë në sallën e madhe të Stokholmit,
ku shpallet e dorëzohet Çmimi, i shoqëruar me një shumë të kënaqshme parash, që i
sigurojnë nobelistit të ri, mundësi për të krijuar në paqe, pa u shqetësuar më nga
kushtet e vështira ekonomike.