Հայաստանի սփիւռքի նախարարի շնորհաւորական խօսքը Սփիւռքի Հայկական դպրոցներու ուսուցիչներուն Երեւան
Ջերմորեն շնորհավորում եմ սփյուռքի մեր հայկական կրթօջախների բոլոր մանկավարժներին` հայ
ուսուցչի մասնագիտական տոնի առթիվ: Այս օրերին Հայաստանում, աշխարհի շատ երկրներում
նշում են Ուսուցչի օրը, և ես ուզում եմ շնորհակալական խոսք ասել ձեզ, սփյուռքի հայկական
դպրոցների սիրելի՛ ուսուցիչներ և տնօրեններ: Ձեզ, որ այդքան սեր, ջերմություն եք ներդնում`
ստեղծելով հայ շունչն ու ոգին սերմանող դպրոցներ, որպեսզի կարողանաք օտար երկրում հայ
երեխաներին սովորեցնել մայրենի լեզուն և հայոց պատմությունը՝ դպրոցը դարձնելով հայ երեխայի
փոքրիկ հայրենիքը: Շնորհիվ հայ դպրոցի է հիմնականում հայը հայ մնացել հայրենիքից դուրս,
իր հոգում և սրտում վառ պահել Մայր հայրենիքի նկատմամբ սերն ու համակրանքը: Հայկական
դպրոցներում հայոց լեզվի, մշակույթի ու պատմության դասընթացների կազմակերպումը ձեր բոլորի
համատեղ նվիրական աշխատանքի, հայրենասիրական, հայապահպանական արդյունավետ գործունեության
արդյունքն է: Ձեր նվիրական գործի արդյունքն է այն, որ հայ երեխան սեփական անձի մեջ տեսնում
է պատկանելությունն իր ազգին: Ձեր ջանքերի, ինքնազոհողության առհավատչյան է այն, որ հաղորդվում
և սերնդեսերունդ փոխանցվում են հային բնորոշ ազգային հպարտության զգացումը, գեղեցիկը,
բարին ու արդարությունը խորությամբ ընկալելու, ազնիվ ու արժանավայել գործերով ինքնություն
հաստատելու հատկանիշները, վերջապես՝ հայի որակները: Օտար երկրներում դպրոցների՝ որպես
ազգաշեն կառույցների գործունեությունը հպարտության զգացում է առաջացնում մեզանից յուրաքանչյուրի
մոտ, հույս պարգևում, հավատ ներշնչում: Ձեր՝ հայ մանկավարժներիդ, նվիրական հայրենասիրական
գործունեությունն, անշուշտ, նպաստում է հայ երեխաների ազգային ինքնության գիտակցության
բարձրացմանը, նրանց հոգիներում հայկականություն սերմանմանը: Հայ դպրոցի սիրելի՛ մանկավարժներ,
կրթական գործի հարգարժան պատասխանատուներ, ուզում եմ իմ անսահման շնորհակալությունը և
ամենամեծ խոնարհումը փոխանցել Ձեզ, որ կարողացել եք օտար հողում հայապահպան մեծ ծրագրեր,
«Հայ դպրոց» ծրագիրն իրողություն դարձնել: Հիրավի, երիցս բարդ է Հայրենիքից հեռու հայեցի
կրթության և դաստիարակության մեծագույն առաքելությունն իրականացնելու Ձեզ վստահված գործը:
Ձեր` հայ մանկան հայեցի լեզվամտածողության ձևավորման նպատակամետ գործունեությունն անվերապահորեն
և ամենամեծ դրվատանքների է արժանի: Փառք ու պատիվ ձեզ, ձեր մարդակերտումի և հայակերտումի
մեծ գործին: Սփյուռքի մեր սիրելի՛ ուսուցիչներ, Հայաստանի Հանրապետությունը հայրենիքն
ու պատվարն է համայն հայության, համոզվա՛ծ եղեք՝ հայրենի իշխանություններն անում են հնարավորը`
սփյուռքի հայ դպրոցի խնդիրներին աջակցելու համար: Այսօր առավել ևս անհրաժեշտ է Ձեր կամքը,
տոկունությունը, երբեք չխաթարվող հավատը վաղվա օրվա հանդեպ, քանզի ձեզնով, ու ձեր կրթած
ու դաստիարակած աշակերտներով է հյուսվում հայի ու Հայաստանի ապագան: Հայաստանի զորությունը
Սփյուռքի զորությունն է, Հայաստանն ուժեղ է ուժեղ Սփյուռքով: Բարին ընդ Ձեզ, սիրելի
ուսուցիչներ: