Сінод Біскупаў: малітва, разважанні і дыскусіі больш 400 удзельнікаў
5 кастрычніка ў Рыме
адбылася прэзентацыя Сінода Біскупаў па новай евангелізацыі. Расказаў пра падрабязнасці
форуму, які пачнецца 7 кастрычніка ў Ватыкане, яго генеральны сакратар арцыбіскуп
Нікола Этэравіч. Ён вылучыў тры асноўныя аспекты Сінода: духоўны, тэалагічна-душпастырскі
і тэхнічны. Іерарх падкрэсліў, што фундаментальным элементам падзеі будзе малітва
яе удзельнікаў. На працягу асамблеі Папа чатыры разы ўзначаліць літургію: на адкрыццё
і закрыццё форума, з нагоды кананізацыі сямі благаслаўлёных, а таксама двух юбілеяў
– 50-годдзя адкрыцця ІІ Ватыканскага Сабора і 20-годдзя выдання Катэхізіса Каталіцкага
Касцёла. Акрамя таго, удзельнікі Сінода будуць збірацца на малітву кожную раніцу і
ў перапынках. Спецыяльна для гэтага ў адпаведнай капліцы будзе арганізавана пастаяннае
выстаўленне Найсвяцейшага Сакрамэнта.
Іншы аспект Сінода Біскупаў – тэалагічна-душпастырскі
звязаны перш за ўсё з аналізам працоўнага дакументу Сінода Біскупаў. Арцыбсікуп нагадаў,
што яшчэ ў сакавіку 2011 г. у мясцовыя епіскапаты была накіравана анкета адносна гэтага
дакумента. Ён выклікаў вялікую зацікаўленасць, аб чым сведчыць тое, што адказы былі
атрыманы больш чым ад 90% епіскапатаў: 100% з Акіяніі, 95,8% з Амерыкі, 88% з Азіі,
81,25% з Еўропы і 66,6% з Афрыкі.
Гаворачы аб тэхнічных аспектах і арганізацыі
Сінода арцыбіскуп Этэравіч адзначыў, што ў ім будуць удзельнічаць 262 сінадальных
айцы – самая вялікая колькасць за ўсё гісторыю. З Еўропы прыбудзе 103 прадстаўніка,
з Амерыкі – 63, Афрыкі – 50, Азіі – 39 і Акіяніі – 7. Акрамя таго, у форуме прымуць
удзел 45 экспертаў і 49 аўдытараў – гэта спецыялісты ў розных сферах, а таксама задзейнічаныя
ў евангелізацыі з усіх пяці кантынентаў.
У праграме мерапрыемства, зацверджанай
асабіста Бэнэдыктам XVI, прадугледжаны 23 агульных сустрэчы і 8 сесій у меншых групах.
У рамках агульных сустрэч кожны Айцец Сінода будзе мець каля 5 хвілін на выступленне,
а таксама каля 3 хвілін падчас вячэрніх дыскусій. Тэксты іх прамоў могуць быць даўжэйшымі
– яны будуць апублікаваны пазней у спецыяльным зборніку.
У Сінодзе прымуць
удзел прадстаўнікі 15-ці Цэркваў і рэлігійных супольнасцяў, якія яшчэ не знаходзяцца
ў адзінстве з Касцёлам, кіраўнікі рэлігійных арганізацыі, асістэнты і перакладчыкі
– ўсяго больш за 400 чалавек.