Më 11 tetor, procesion në Romë për 50-vjetorin e Koncilit II të Vatikanit
Ashtu si 50 vjet më parë, në ditën e hapjes së Koncilit II të Vatikanit, në mbrëmjen
e 11 tetorit, një procesion me qirinj do të mbërrijë në Sheshin e Shën Pjetrit. “Kisha
e bukur e Koncilit”: kjo është tema e kësaj nisme, organizuar nga Veprimi Katolik
Italian, në bashkëpunim me dioqezën e Romës. Parashikohet që Papa t’i përshëndesë
të pranishmit nga dritarja e Pallatit Apostolik. Kujtojmë se ardhja e besimtarëve
me qirinj të ndezur në sheshin e Shën Pjetrit, 50 vjet më parë, bëri që Papa i atëhershëm,
Gjoni XXIII të dilte në dritare e të shqiptonte atë, që hyri në histori me emrin “Fjalimi
për Hënën”. Edhe kësaj radhe, procesioni do të jetë një çast gëzimi e lutjeje, siç
na shpjegon në mikrofonin tonë, kryetari i Veprimit Katolik Italian, Franko Miano: Koncili II
i Vatikanit na thotë se detyra themelore e Kishës është t’i tregojë mrekullitë e Zotit
njeriut të kohës sonë, t’i kumtojë atij Ungjillin e Krishtit. Mbi këtë bazohet dialogu,
bashkëndarja, përgjegjësia e përbashkët: duhet të nisemi nga këto rrënjë të thella,
në të cilat ne besojmë se është e rëndësishme të kthehemi. Ne nisemi nga Koncili,
i cili duhet të na ndihmojë në këtë kohë të re, ku duam të dëshmojmë sa bukur është
të jesh i krishterë. Por ja një çast i Koncilit II të Vatikanit, treguar nga
një person që e ka përjetuar vetë, ka qenë i pranishëm. Është drejtori i atëhershëm
i gazetës së parë italiane me frymëzim katolik “L’Avvenire d’Italia” (E ardhmja e
Italisë), Raniero La Valle: Sot, dua të tregoj diçka, që ndoshta askush nuk
e di. Ai “fjalimi i famshëm për Hënën” i Papës Gjoni XXIII u transmetua dhe u pa nga
e gjithë bota, sepse atë mbrëmje isha në RAI (Radiotelevizioni Italian), në rrugën
Teulada, për të përgatitur një dokumentar mbi Koncilin, që duhej të transmetohej në
orën 21.00. Si drejtor i një gazete katolike, konsiderohesha ekspert i punëve të Kishës.
E kishim përgatitur dokumentarin, por donim të vendosnim në të edhe ndonjë imazh nga
procesioni me qirinj, që po zhvillohej në Vatikan. Por, surprizë: procesioni përfundoi
me një fjalim të Papës, pikërisht me “Fjalimin për Hënën”, e atëherë, Luka Di Skiena,
regjizor i madh i këtyre ngjarjeve, mori vendimin për ta lënë mënjanë dokumentarin
e për të transmetuar Gjonin XXIII. E kështu, ai fjalim hyri në histori.