Myslimanët e Austrisë i kërkojnë Arabisë Saudite të lejojë ndërtimin e kishave të
krishtera
Jo fjalë abstrakte për lirinë e fesë, por shenja konkrete, që hapin horizonte të reja
dialogu. Një shoqatë myslimane e Vjenës, në Austri, që quhet “Nisma e myslimanëve
liberalë Austri”, kërkon ndërtimin e një kishe në Arabinë Saudite, vend ku ndalohet
shpallja publike e fesë së krishterë. “Ashtu si Islami në Evropë, edhe krishterimit
i duhet njohur e drejta për lirinë e kultit”, shkruhet në një notë të organizatës
për ambasadorin saudit në Vjenë, Mohammed al-Salloum. Kreu i shoqatës i ka kërkuar
diplomatit një takim, ku të paraqesë idetë për realizimin e këtij projekti. Fakti
që ndalohet shpallja publike e fesë së krishterë në Arabinë Saudite, përfaqëson dhunim
të qartë të parimit të lirisë së besimit, shkruhet në notën, e botuar edhe në gazetën
vatikanase “L’Osservatore Romano”. Arabia Saudite financon masivisht ndërtimin
e xhamive e të vendeve të kultit në Evropë, por nuk pranon që të krishterët të ndërtojnë
kisha në territorin e vet. Që nga viti 2006, autoritetet saudite janë impenjuar t’u
garantojnë besimtarëve jo myslimanë të drejtën për t’u lutur privatisht, në shtëpitë
e tyre, por nuk mund ta bëjnë këtë publikisht. Gjithashtu, ndalohen kthimet nga islamizmi
në krishterim.