Ղպտիները Կը Բողոքեն Եգիպտոսի Մէջ Իրենց Թիւի Մասին Տուեալներուն Խեղաթիւրման Դէմ :
«ՌԻԱ Նովոսթի» լրատու գործակալութիւնը` յղում կատարելով Վատիկանի ձայնասփիւռի կայանին,
կը հաղորդէ, որ Ղպտի ուղղափառ եկեղեցին պաշտօնական բողոք արտայայտած է` յայտարարելով,
որ Եգիպտոսի իշխանութիւնները միտումնաւոր կերպով երկրին մէջ ղպտիներու թիւին վերաբերեալ
նուազեցուած տուեալներ կը հրապարակեն: Ըստ Եգիպտոսի Կեդրոնական վիճակագրական գործակալութեան
անցեալ շաբաթ հրապարակած տուեալներուն, երկրին մէջ կը բնակին 5.13 միլիոն քրիստոնեաներ,
ինչ որ Եգիպտոսի 83 միլիոն բնակչութեան 4 առ հարիւրը կը կազմէ:
Միեւնոյն ժամանակ,
անցեալ տարի Ղպտի Ուղղափառ եկեղեցւոյ նախաձեռնութեամբ Եգիպտոսի քրիստոնեայ համայնքներուն
մէջ կատարուած մարդահամարը այլ արդիւնք ցոյց տուած էր: Ըստ այդ վիճակագրութեան, Եգիպտոսի
մէջ քրիստոնեաներուն թիւը 17 միլիոն է, ինչ որ Եգիպտոսի բնակչութեան 20 առ հարիւրը կը
կազմէ: Այս տուեալները կը հաստատեն նաեւ աւստրիական «Փրօ Օրիենթէ» հիմնադրամի փորձագէտները: Եգիպտոսի
քրիստոնեաներու թիւին վերաբերեալ տուեալները երկար տարիներ իրականութենէն լրջօրէն տարբեր
եղած են: Նախկին նախագահ Հիւսնի Մուպարաքի վարչակարգի շրջանին տեղեկութիւններ կը հրապարակուէին,
թէ Եգիպտոսի մէջ 3.3 միլիոն քրիստոնեայ կը բնակի, իսկ ըստ Ղպտի ուղղափառ եկեղեցւոյ, միայն
այդ եկեղեցւոյ անդամներուն թիւը 2008-ին 12 միլիոն էր:
Եգիպտոսի քրիստոնեաները
մտավախութիւն ունին, որ կառավարական կեղծ վիճակագրական տուեալները կրնան նոր իշխանութիւններուն
կողմէ օգտագործուիլ քրիստոնեաները լուսանցքայնացնելու համար, ինչպէս երկար տարիներ շարունակ
ատիկա կը կատարուէր Մուպարաքի կառավարման շրջանին: Այս հարցով Ղպտի Ուղղափառ եկեղեցւոյ
բողոքին միացած են նաեւ Եգիպտոսի քրիստոնէական այլ համայնքներ