Në Jordani, imzot Lahham shpreh frikën për manifestimin islamik të së premtes
“Të premten e ardhshme, partia e “Vëllezërve Myslimanë” ka organizuar një manifestim
të madh kundër zgjedhjeve. Krerët fisnorë kanë kërcënuar se do të sjellin në sheshe,
rreth 200 mijë vetë, të armatosur me thika e armë të tjera të ftohta, gati për të
krijuar kaos. Shpresojmë që kjo të mos ndodhë”: janë fjalët e kryeipeshkvit Maroun
Lahham, vikar patriarkal për Jordaninë i Patriarkatit latin të Jeruzalemit. Prelati
përshkruan për agjensinë kishtare Fides, situatën në të cilën ndodhet mbretëria hashemite,
me zgjedhjet e parashikuara në fund të vitit. Para perspektivës së destabilizimit
të Jordanisë së mbretit Abdallah II, kryeipeshkvi thekson disa pika të panegociueshme:
“Zgjedhjet e ardhshme duhet të jenë zgjedhjet e para të lira e demokratike në Jordani.
Qeveria do të emërohet, për herë të parë, nga partia e shumicës. Deri tani, mbreti
ishte ai, që emëronte qeverinë e kryeministrin. “Vëllezërit Myslimanë” kanë shpallur
me kohë se do t’i bojkotojnë zgjedhjet. Nëse premtimet për një garë zgjedhore të lirë
e demokratike do të mbahen, kjo parti mund të ketë peshë në zhvillimet politike në
vend. Nëse do të vazhdojë të mbështesë idenë e bojkotimit, qëndrimi i saj do të jetë
vetëm negativ”. Sipas imzot Lahham, në situatën delikate të Jordanisë ndikon paqëndrueshmëria
e krejt rajonit të Lindjes së Mesme. “Në Siri – thotë ai për agjensinë Fides – gjendja
është gjithnjë e më e errët. Deri tani, si Kishë, ngulim këmbë në thirrjen për paqe,
për pajtim e falje, por nuk shihet asnjë rrugëdalje nga kjo krizë, me qeverinë që
nuk lëshon pe, nga njëra anë, dhe me rezistencën, që duket se mbështetet gjithnjë
e më shumë me armë nga jashtë, nga ana tjetër. Ndërsa afrohet dimri, bëhet dramatike
gjendja e emigrantëve, të grumbulluar me mijëra në kampin e Zataarit. Ndër ta, janë
infiltruar dhjetra agjentë sirianë, për të krijuar probleme edhe me Jordaninë. Kur
zbulohen, dërgohen menjëherë mbrapsht në vendin e tyre”.