Հայ Կաթողիկէ Մեսրոպեան բարձրագոյն վարժարանի մանկապարտէզին վերամուտը տեղի ունեցաւ Երեքշաբթի,
2 Հոկտեմբեր -ին, առաւօտեան ժամը 7:45-ին, Մանկապարտէզի վերանորոգուած բակին մէջ, ներկայութեամբ
մեծաթիւ ծնողներու :
Տէրունական աղօթքէն ետք, Մեսրոպեան վարժարանի մանկապարտիզպանուհի
տիկին Մարիա Պէoճէքեան յոյս յայտնեց, որ նոր տարեշրջանին աշակերտները ուրախ եւ դաստիարակիչ
միջավայրի մէջ կ՚անցընեն օգտաշատ պահեր: Ապա մանկապարտէզի ուսուցչուհիները ներկայացուցին
կոկիկ գեղարուեստական յայտագիր մը, որուն բեմավարն էր մանկապարտէզի ուսուցչուհի օրիորդ
Շողիկ Եփրեմեան: Ուսուցիչները հայկական եւ օտար պարերով ստեղծեցին խանդավառութիւն եւ
հաճելի մթնոլորտ: Մանկապարտէզի աշակերտները մասնակցեցան շուրջպարին, որուն ծնողները միացան
ծափահարութիւններով: Այս առիթով, աշակերտներուն բաժնուեցան կարմիր, կապոյտ եւ նարնջագոյն
գոյներով պատրաստուած «Վերամուտ» բառը կրող դրօշակներ: Աւարտին, խօսք առաւ Հայ Կաթողիկէ
Մեսրոպեան բարձրագոյն վարժարանի տնօրէն պրն. Կրէկուար Գալուստ, որ նշեց, թէ վերամուտի
հանդիսութեան հոգատարութիւնը, գուրգուրանքն ու ժպիտը աշակերտներուն պիտի ընկերակցի ամբողջ
տարեշրջանին ընթացքին: Մեսրոպեանի տնօրէնը հաստատեց, որ տնօրէնութիւն-ուսուցիչներ-ծնողք
գործակցութեամբ կ՚իրականանան մանկապարտէզին ծրագիրները, որովհետեւ «Մեր աշակերտները արժանի
են լաւագոյնին»: Անդրադառնալով Մեսրոպեան վարժարանի նորութիւններուն, պրն. Գալուստ
ըսաւ, որ մանկապարտէզի բակին «կանաչապատում»ը առաջին քայլն է, եւ յառաջիկայն պիտի իրականան
բարգաւաճման նպաստող այլ աշխատանքներ, որովհետեւ կրթական կառոյցները մշտապէս զարգացման
մարտահրաւէրը ունին: Պրն. Կրէկուար Գալուստ մաղթեց, որ վերանորոգուած բակին նման, մանկապարտէզը
կ՚ունենայ կանաչ տարեշրջան մը, լի նոր յաջողութիւններով եւ իրականացնելով կրթական, ազգային
եւ հոգեւոր նպատակները: