Sapë: shugurimi i Kishës së re të Shën Mihillit në Nënshat
Në kuadrin e kremtimeve jubilare të 950-vjetorit të themelimit të dioqezës së Sapës,
Delegati Papnor kardinali Abtil Santos y Castello shuguroi Kishën e re të Nënshtatit
të Zadrimës, kushtuar shën Mihillit Kryengjëll. Kjo bashkësi kishtare drejtohet nga
Etërit Françeskanë Kapuçinë. Kisha e re është simbol i fuqisë së fesë në Zotin që
ushqeu shpresën tek besimtarët edhe në periudhën më ashpër e të errët të persekutimit
komunist. Po kështu kjo Kishë dëshmon edhe lashtësinë e pranisë së krishterimit në
këto vende e treva, siç dëshmojnë gjurmët e shumë Kishave të lashta të rrënuara nga
sunduesit e huaj gjatë shekujsh. Sot Kisha e re e shën Mihillit dëshmon edhe gjallërinë
e popullit shqiptare dhe tregon udhën e ndërmarrë drejt vlerave shpirtërore, kulturore,
shoqërore e kombëtare. Po më hollësisht nga Vau-Dejës të ndjekim shërbimin e Violeta
Marashit..........
Gjatë kremtimeve
të 950 vjetorit te themelimit te Dioqezes se Sapës, kujtojme se Eminenca e Tij Kardinal
Abril Santos y Castello shuguroi edhe Kishën e re kushtuar Shën Mëhillit në Nënshat
të Zadrimës, pikërisht në vendin ku u lind kjo Dioqezë. Bashkësia famullitare dhe
Etërit Kapuçinë në Nënshat me gëzim morën pjesë në shugurimin e Kishës së re kushtuar
pajtorit të kësaj famullie Shën Mëhillit. Në vigjiljen e festës së këtij shenjti besimtarë
të shumtë ngarendën drejt kishës së re për të marrë pjesë në kremtimin eukaristik
të udhëhequr nga Eminenca e Tij Kardinal Castello, në bashkëkremtim me Ipeshkëvin
e vendit, Imzot Lucjan Avgustinin, Ipeshkëvin e Kosovës, provinciali i fretërve Kapuçinë
nga Puglia dhe me mbarë klerin dioqezan. Menjëherë pas fillimit të Meshës, i
zoti i shtëpisë, Imzot Lucjan Avgustini shprehi mirënjohjen e tij të thellë për praninë
e Eminencës së tij, Kardinal Castellon në shugurimin e Kishës së re ndërtuar në nder
dhe lavd të të Madhit Zot dhe që shënon një faqe të re historike, për vetë faktin
se është e mbushur me histori të kishave që ka në afërsi, duke filluar që nga rrënojat
në majë të malit dhe që janë themelet e Katedrales së parë; pak metra më sipër kësaj
kishe kemi katedralen e dytë kushtuar Shën Gjergjit, e cila ndriçon edhe sot si Dritë
e Krishtit jo vetëm mbi këtë fshat, por mbi të gjithë Zadrimën tha Imzot Lucjani.
Në fjalën e rastit, Eminenca e Tij, Kardinal Santos theksoi se është çasti për
të hapur zemrat tona në lavdet dhe falenderimet për Hyjin që na lejon të marrim pjesë
në këtë rit liturgjik, të hapur ndaj mirënjohjes së sinqertë për të gjithë ata që
kanë menduar për realizimin e këtij projekti. Të gjithë meritojnë një fjalë mirënjohjeje
që në emër të Atit të Shenjtë dua t’ju shprehi, i cili është në dijeni të kësaj iniciative
dhe me zemër i bekon të gjithë ata që kanë bashkëpunuar në realizimin e këtij projekti
tha mes të tjerash i deleguari Papnonr, Kardinal Santos. Gjatë ritit solemn të
kushtimit të kishës së re, e cila ishte e mbushur me ndjenja gëzimi dhe lutjeje, Eminenca
e Tij, bëri bekimin e mureve të tempullit të ri, që bekimi i Zotit të zbresë mbi popullin
e krishterë. Më pas vazhduan ritet e lyerjes, kemimit, mbulimit dhe të shndritjes
së elterit të cilat shprehin me shenja të dukshme disa aspekte të asaj vepre të padukshme
që Zoti ushtron nëpërmjet Kishës, kur ajo kremton misteret hyjnore e në mënyrë të
veçantë Eukaristinë. E gjithë asamblea e shenjtë e mbledhur përreth elterit iu
lutën zotit që të dërgojë bekime gjithnjë e më shumë për mbarë bashkësinë e krishterë
të kësaj famullie, dhe falenderuan Zotin dhe bamirësit për ndërtimin e këtij tempull
të ri. Violeta Marashi