Кардынал Сара аб сувязі дабрачыннасці і евангелізацыі
Выступаючы на штогадовым
сходзе паўночна-амерыканскай дабрачыннай арганізацыі “Catholic Charities”, старшыня
Папскай рады “Cor Unum” заклікаў яе членаў чэрпаць сілы са сваёй каталіцкай ідэнтычнасці
і прыняць удзел у новай евангелізацыі. На яго думку, сёння Касцёлу ў ЗША, у тым ліку
каталіцкім дабрачынным арганізацыям, пагражае страта спадчыны, перададзенай папярэднімі
пакаленнямі. “Час, у які мы жывем, характарызуецца агрэсіўным секулярызмам, які імкнецца
выключыць рэлігію з грамадскага жыцця і, як следства, стварыць культуру без Бога,
дзе кожны можа жыць без закона праўды і любові, напісанага ў сэрцы кожнага чалавека
Творцам”, - звярнуў увагу паходзячы з Гвінеі ватыканскі іерарх.
Кардынал заўважыў,
што “каталіцкія дабрачынныя арганізацыі не вызвалены ад уздзеяння секулярызаванага
менталітэту” і як прыклад прывёў сітуацыю, калі амерыканскае кіраўніцтва аказвае ціск
на на каталіцкія агенцтвы па ўсынаўленні, каб тыя дапамагалі ўсынаўляць дзяцей аднаполым
парам, што недапушчальна з пункту гледжання каталіцкага веравучэння. Іерарх перакананы,
што ў гэтых новых складаных умовах трэба прызнаць важныя пытанні аб сэнсе цярпення
і жыцця і быць у стане даць на іх вычарпальны адказ. Паводле яго, цяжкасці даюць католікам
выключную нагоду, вярнуцца да каранёў сваёй каталіцкай ідэнтычнасці
Ён запрасіў
прадстаўнікоў дабрачынных арганізацый пачаць з простага пытання: якая сувязь паміж
дабрачыннай дзейнасцю і евангелізацыяй? Іерарх звярнуў увагу на важнасць сувязі свецкіх
вернікаў з пастырамі Касцёла. Паводле кардынала Сара, каталіцкая ідэнтычнасць можа
быць па-сапраўднаму “шлюзам” абнаўлення дабрачыннай дзейнасці.