Përfundoi në Zvicër, asambleja e Këshillit të Konferencave Ipeshkvnore të Evropës
Të pranojmë sfidën e shekullarizimit. Me këtë synim përfundoi dje, asambleja e përgjithshme
e Këshillit të Konferencave Ipeshkvnore të Evropës, e cila u mblodh më 27 shtator
në qytetin zviceran San Galen. Kreu i Këshillit, kardinali Peter Erdë, deklaroi në
përfundim të punimeve se Kisha e sotme duhet t’i kuptojë e t’i pranojë shenjat e shpresës,
fryt i Koncilit II të Vatikanit. Në Meshën që mbylli punimet, kremtuar në katedralen
e qytetit, u përmendën temat kryesore të asamblesë së këtij viti. Mëse 50 kardinaj
e ipeshkvij nga e gjithë Evropa, diskutuan për katër ditë me radhë mbi sfidat e kontinentit
të vjetër, si kriza ekonomike, por edhe ungjillëzimi i ri. Kardinali Erdë theksoi
se kriza ekonomike në Evropë karakterizohet nga shumë probleme, jo të lehta për t’u
zgjidhur, por edhe nga shpresa. Por, cilat janë sfidat para Evropës, për të cilat
folën ipeshkvijtë? Të dëgjojmë kryetarin e Konferencës Ipeshkvnore të Italisë, kardinalin
Anxhelo Banjasko: Sfida e parë, ajo themelore, është të rizbulojë rrënjët e
veta shpirtërore, pra, atë bashkësi idealesh, vlerash shpirtërore e morale, që kishin
në mend për Evropën etërit e shquar të saj, si Shumani, Adenaueri e De Gasperi. Brenda
kësaj sfide të parë, qëndron e dyta. Me ndihmën e të gjithëve - së pari, me ndihmën
tonë si Kishë Katolike – Evropa duhet të asimilojë nga pikpamja kulturore, dy kategori
themelore, që më duket se janë dy shtyllat e Bashkimit Evropian: lirinë si fryt i
Ungjillit dhe kategorinë e mos diskriminimit. Sfida e tretë është bashkimi politik
e jo vetëm ekonomik. Evropa nuk duhet të rëndojë mbi vendet anëtare; bashkimi duhet
të jetë “i lehtë”, nëse mund të thuhet kështu, por pa të nuk mund të flitet për unitet
evropian e për një vend në botën e globalizuar, që të mos jetë thjesht një grumbull
shtetesh, por diçka me identitet të ri.