Kryeministri Berisha priti në një takim kardinalin Abril Y Castello, në Shqipëri,
si Delegat i Papës, me rastin e 950-vjetorit të dioqezës së Sapës
Kryeministri Berisha priti dje në një takim në Tiranë Hirësinë e Tij Kardinalin Abril
Y Castello, i cili ndodhet për një vizitë në Shqipëri, si Delegat i Papës, me rastin
e kremtimeve të 950-vjetorit të dioqezës së lashtë shqiptare të Sapës. Kardinal
Castello shprehu kënaqësinë për këtë vizite dhe mikpritjen dhe, në emër të Atit të
Shenjtë Papës Benediktit XVI, i përcolli Kryeministrit të Shqipërisë përshëndetjet
e përzemërta. “”Në emër të Shenjtërisë së Tij, ju përcjell përshëndetje të posaçme.
Ai ndjek me shumë interes të gjitha çështjet e Shqipërisë dhe është në dijeni të gjithçkaje
pozitive që po ndodh këtu. Me ngarkoi t’ju shpreh afërsinë dhe vëmendjen e Tij për
zhvillimet këtu, si dhe urimet më të mira për të ardhmen”. Kardinal Castello vlerësoi
pune e mirë të qeverisë dhe siguroi për vazhdimësinë e bashkëpunimit të Kishës Katolike,
në synimin e përbashkët për të ndërtuar një shoqëri të bazuar në vlera të shëndosha. Pasi
i uroi mirëseardhjen, Kryeministri Berisha i shprehu Kardinalit Castello kënaqësinë
për ketë vizitë, në kuadrin e 950 vjetorit të Dioqezës së Sapës, përvjetor i cili
përkon me 100 vjetorin e Pavarësisë së Shqipërisë. Kryeministri e cilësoi Dioqezën
e Sapës si një kështjellë e cila i ka frymëzuar shqiptarët në shekuj drejt vlerave
dhe idealeve të lirisë.
Kryeministri i shprehu gjithashtu Hirësisë së Tij Kardinalit
Castello mirënjohjen për mbështetjen e madhe dhe të vazhdueshme që Ati Shenjtë Papë
dhe Selia e Shenjtë i kanë dhënë Shqipërisë përgjatë historisë së saj, në mënyrë të
veçantë pas rënies së komunizmit. Kryeministri Shqipërisë Berisha u shpreh se Kisha
Katolike, bashkë me komunitetet e tjera fetare, kanë bërë një punë shumë dimensionale
dhe të çmuar, duke kontribuar në mënyrë të jashtëzakonshme ne rindërtimin, jo vetëm
të institucioneve fetare, por dhe në ri-ngritjen e shtyllave morale të shoqërisë. Të
dy bashkëbiseduesit çmuan faktin se Shqipëria, pavarësisht se është një vend shumë
fesh, është një shembull që tregon një vlerë të jashtëzakonshme, që është respekti
dhe toleranca ndërfetare. Kryeministri theksoi se kjo vlerë qëndron edhe në themel
të presidencës shqiptare të Këshillit të Evropës, e cila ka përzgjedhur si moto të
saj; “Të bashkuar në diversitet”. Kardinal Castello theksoi se eksperienca shqiptare
është një shembull për t’u ndjekur në Evropë, e cila duhet ta përballë krizën e rendë
që po përjeton jo vetëm nëpërmjet parimeve dhe instrumenteve të tregut, por duke u
bazuar në vlerat më të mira të shoqërisë. Kryeministri shprehu edhe njëherë dëshirën,
jo vetëm të tij, por edhe të gjithë shqiptareve, që Shenjtëria e Tij Papa Benedikti
i XVI të vizitojv Shqipërinë.