Papa në audiencën e përgjithshme: liturgjia, vend i privilegjuar për takimin e të
krishterëve me Zotin
“Liturgjia, shkollë lutjeje”: kjo ishte tema e audiencës së sotme të përgjithshme
të Benediktit XVI, e cila u zhvillua në Sheshin e Shën Pjetrit. Papa kujtoi Koncilin
II të Vatikanit, që i filloi punimet pikërisht me një skemë mbi liturgjinë e shenjtë,
duke vënë në dukje primatin e Zotit. Ati i Shenjtë nënvizoi se në dialogun me Hyjin,
pra, në liturgji, është themelore, që ç’themi me gojë të përkojë me ç’mbajmë në zemër. Liturgjia,
vërejti Papa, është vendi i privilegjuar i takimit të të krishterëve me Zotin. Shkolla
e parë e lutjes, shpjegoi Benedikti XVI, është Fjala e Zotit, Shkrimi i Shenjtë, dialogu
i përhershëm i Hyjit me njeriun. Por, një hapësirë tjetër e çmuar për të mësuar si
të lutemi, është edhe liturgjia, të cilën Katekizmi i Kishës Katolike e quan “shërbim
nga populli e për popullin”: “Në fakt, Populli i Zotit nuk ekziston për hir
të lidhjeve të gjakut, të territorit, apo të kombit, por lind gjithnjë nga vepra e
Birit të Hyjit e nga bashkimi me Atin, që Ai fiton për ne”. Duke folur për
skemën mbi liturgjinë e shenjtë, me të cilën filloi Koncili, Papa nënvizoi se ajo,
që dukej si rastësi, vuri në dukje qartë primatin e Zotit mbi gjithçka, përparësinë
e Tij absolute për të gjithë Etërit konciliarë: “Para së gjithash Hyji: pikërisht
këtë na thotë vendimi konciliar për të filluar nga liturgjia. Aty ku vështrimi i Zotit
nuk është i rëndësishëm, çdo gjë tjetër e humb orientimin. Kriteri themelor për liturgjinë
është orientimi i saj kah Zoti, për të marrë pjesë kështu, në veprën e Tij”. Por
si e ku duhet të marrim pjesë, pyeti Papa: “Përgjigjja është: në veprën e Krishtit
përmes Kishës, në liturgji, në veçanti në Sakramentin e Eukaristisë, që e bën të pranishme
dhuratën e flijimit të Birit të Zotit, që na shëlboi; në Sakramentin e Pajtimit, përmes
të cilit kalojmë nga vdekja e mëkatit në jetën e re; e në veprat e tjera sakramentore,
që na shenjtërojnë”. Misteri i Pashkëve, vazhdoi Benedikti XVI, është në qendër
të teologjisë liturgjike të Koncilit. Liturgjia na jep fjalët, por jemi ne ata, që
duhet të hyjmë në kuptimin e tyre më të thellë: “Element themelor, parësor
në dialogun me Hyjin përmes liturgjisë, është përkimi ndërmjet asaj, që themi me gojë
e asaj, që mbajmë në zemër”. E kjo zemër duhet të shohë lart, përtej shqetësimeve
të përditshme, duhet të hapet ëmbëlsisht nga Fjala e Zotit, të marrë pjesë në lutjen
e gjithë Kishës. Vetëm kështu, zemra kthehet kah Hyji: “Kur e përjetojmë në
liturgji këtë lloj gjendjeje themelore, në zemrën tonë duket sikur nuk ka fuqi të
veprojë forca e rëndesës, që e tërheq poshtë, e ajo fluturon lart, drejt së vërtetës,
drejt dashurisë, drejt Zotit”. Ja përse, shpjegoi Papa, e ndjejmë kremtimin
e liturgjisë vetëm nëse e përgatisim shpirtin me lutje, duke u bashkuar me Misterin
e Krishtit e me bisedën e Tij si Bir me Atin e vet Qiellor.