Бэнэдыкт XVI пажадаў,
каб у Албаніі пашыралася Хрыстовае пасланне. Аб малітве ў гэтай інтэнцыі Святы Айцец
заклікаў вернікаў з нагоды 950-годдзя дыяцэзіі Сапё. Яна знаходзіцца ў паўночнай частцы
краіны, на мяжы з Чарнагорыяй. 29 верасня, у свята Міхала Арханёла тут адбудзецца
святкаванне юбілея дыяцэзіі. Урачыстасці ўзначаліць спецыяльны пасланнік Папы – кардынал
Сантас Абрыл і Кастэло, архіпрэзбітэр базылікі Санта Марыя Маджорэ ў Рыме. У спецыяльным
лісце Бэнэдыкта XVI, якім ён прызначыў іспанскага кардынала сваім прадстаўніком на
святкаваннях у Албаніі, Святы Айцец пажадаў мясцовым католікам узрастаць у веры, якая
тут абвяшчалася яшчэ са старажытнасці. Ён нагадаў, што прыкладам для іх можа быць
таксама іх зямлячка Маці Тэрэза. Папа заклікаў албанцаў да міру паміж сабой і з Богам.
Акрамя таго, Святы Айцец павіншаваў жыхароў гэтай краіны з Днём незалежнасці, які
будзе адзначацца 28 лістапада. Ён пажадаў рэлігійнага і чалавечага развіцця, што асабліва
актуальна для краіны, у якой на працягу паловы стагоддзя камуністычныя ўлады забаранялі
вызнанне якой-небудзь рэлігіі.