Кардынал Кох: хрысціянскія Цэрквы Лівана супольна адказваюць на праблемы
Вялікім крокам у накірунку
адзінства з праваслаўнымі Цэрквамі назваў візіт Бэнэдыкта XVI у Ліван кардынал Курт
Кох. У інтэрв’ю “L‘Osservatore Romano” старшыня Папскай рады спрыяння хрысціянскаму
адзінству, які сам быў у складзе дэлегацыі Святога Пасаду і на ўласныя вочы бачыў
энтузіязм, з якім у момант цяжкіх выпрабаванняў прымалі Папу ліванцы і ўвесь Блізкі
Усход. “Я упэўнены, што гэты візіт моцна паспрыяе паглыбленню экуменічных адносін
і дасць новы штуршок пошуку поўнага адзінства паміж хрысціянамі”, - сказаў іерарх
і дадаў, што адносіны паміж Каталіцкім Касцёлам і ўсімі Праваслаўнымі і Усходнімі
Цэрквамі пастаянна паляпшаюцца”. Іерарх адзначыў, што добрыя стасункі і пастаянны
кантакт паміж хрысціянскімі супольнасцямі Лівана абумоўлены супольнай дзейнасцю у
адносінах да розных сітуацый. Ён падкрэсліў, што паміж хрысціянамі ў Ліване плануецца
правядзенне супольных ініцыятываў. “Мне расказаў мараніцкі Патрыярх Раі, што плануе
праводзіць сустрэчы з прадстаўнікамі ўсіх Праваслаўных Цэркваў, каб разам чытаць і
разважаць над паслясінадальнай Апостальскай Адгартацыяй “Ecclesia in Medio Oriente”.
Гэтую ініцыятыву іерарх плануе паўтарыць таксама і з мусульманамі”, - сказаў кардынал
Кох. Іерарх падкрэсліў, што “прыклад сужыцця рэлігій у Ліване можа служыць узорам
для ўсіх” і адзначыў, што ў многім гэта магчыма дзякуючы свецкасці дзяржавы і яе павазе
да розных рэлігій. “Мне здаецца, што гэты добры прыклад мог бы быць пераняты ўсімі
краінамі, і не толькі на Блізкім Ўсходзе”, - адзначыў кардынал Кох.