Mons. Eleuterio F. Fortino, një jetë në shërbim të bashkimit të të krishterëve
e të shqiptarëve.
Dy vit më parë, më 22 shtator 2010 ndërronte jetë arkimandriti mons. Eleuterio
F. Fortino, prift arbëresh, gjiganti i ekumenizmit, bir i ndritur i Arbëreshëve. Përkujtojmë
dy vjetorin e ndarjes nga jeta të Arkimandritit arbëresh mons. Eleuterio Francesco
Fortino. Zemra e tij pushoi së rrahuri më 22 shtator 2010 në poliklinikën Torrvergata
në Romë, pas një sëmundje të gjatë. Mons. Fortino, arbëresh nga San Benedetto Ullano,
jetonte në Romë e Vatikan prej vitit 1965 ku punoi më detyra të ndryshme, ndër to
po përmendim punën më se 25 vjeçare si protagonist i dialogut ekumenik dhe rolin e
zëvendëssekretarit të Këshillit Papnor për Bashkimin e të Krishterëve. Figurë
poliedrike, mons. Fortino meshtar i ritit bizantin, gëzoi nderimin dhe respektin e
të gjithëve pa dallim, pa përjashtim. Njohës i thellë i teologjisë, i spiritualitetit
e i kulturës, predikatar e komunikues i jashtëzakonshëm, i përzemërt e mikpritës,
kultivues e urë lidhës i marrëdhënieve mes njerëzve, Kishave e kulturave, mons. Fortino
gjatë veprimtarisë së tij të shkëlqyeshme që zhvilloi në Romë e në Vatikan, dha një
kontribut prej protagonisti tejet të rëndësishëm për dialogun ekumenik të Kishave,
për mbarë komunitetin e Arbëreshëve të Italisë si dhe për popullin shqiptar në përgjithësi. Falë
punës së tij e largpamësisë që kishte, themeloi në Romë rrethin kulturor të Arbëreshëve
të Italisë “Besa” duke e bërë Kishën e Shën Atanazit, ku shërbente, pik referimi për
të gjithë besimtarët e krishterë arbëresh të Romës e për të shqiptarët pa dallim.
Shtëpia e tij ishte gjithmonë e hapur. Edhe pse prej vitesh nuk jetonte më në vendet
arbëreshe, diti ti mbante të gjalla marrëdhëniet me Eparkinë e Ungros e të Horës së
Abreshëve, si dhe me Kishën Katolike e atë Ortodokse të Shqipërisë, me Kosovën e me
diasporën shqiptare e të gjitha anëve. Gjatë veprimtarisë së tij të frytshme, ka
botuar shumë shkrime teologjike, kulturore, kombëtare dhe shoqërore, ndër to po përmendim
qarkoren “Besa” dhe pesëdhjetë “Sussidi catechetici” – “Libra katekizmi”, pastaj
librin “Kisha bizantine arbëreshe e Kalabrisë”. Tema e njërit prej vëllimeve të fundit
të kësaj serie, “Epèktasis” – “gjithmonë të prirë përpara”, thirrja e krishterë sipas
Shën Gregorit nga Nisa, është njëkohësisht sintezë e modus operandi i Arkimandritit
Fortino dhe një mesazh drejtuar komunitetit të arbëreshëve e të gjithë shqiptarëve
që kanë për detyrë ta ruajnë kujtimin e tij të përjetshëm si thirrje për të “qëndruar
të fortë gjatë udhës” drejt Amshimit. Papas Eleuterio Fortino, një jetë në shërbim
të bashkimit të të krishterëve e të shqiptarëve, prifti i shquar arbëresh mons.
Eleuterio Fortino qe urë lidhëse mes Kishës Katolike Romake e Kishave Ortodokse e
tyre Lindore në përgjithësi, aq sa të quhet kujtesa dhe “shpirti i arkivit” të çështjes
ekumenike. Në anën kulturore kombëtare shqiptare ai qe hallkë mes botës arbëreshe
e botës shqiptare. Një jetë e tërë në shërbimit të bashkimit të të krishterëve e të
të gjithë shqiptarëve. Me të gjitha angazhimet që kishte në nivelin e Kishës Universale
duke punuar në Këshillin Papnor për Bashkimin e të Krishterëve dhe në fusha tjera
të veprimtarisë së tij teologjike, kishtare e kulturore, prifti arbëresh, mons. Eleuterio
Fortino, me bashkëpunimin e tij të çmueshëm ka nderuar e pasuruar edhe Programin Shqip
të Radio Vatikanit, që ruan në arkiv biseda e intervista të tij me vlerë. Megjithëse
i lodhur prej vuajtjeve fizike shkaktuar nga sëmundja, atij nuk i mungonte kurrë buzëqeshja,
fjala e ngrohët dhe e përzemërt me këdo që takohej. I përjetshëm qoftë kujtimi
yt, o i lumturi dhe i përkujtuari vëllai ynë. Eonìa su i mnìmi, axiomakàriste
ke aìmniste adhelfe imòn.