23 верасня ў малітве
“Анёл Панскі” у Кастэль Гандольфа прымуць удзел члены канфедэрацыі сельскагаспадарчых
прадпрымальнікаў Італіі, пасля чаго паднясуць Бэнэдыкту XVI свой спецыяльны падарунак
- вінаградную лазу. Ідэя з’явілася са слоў Папы Ратцынгера пры ўступленні на Апостальскі
Пасад: “Я паслухмяны работнік у Панскім вінаградніку”. Лаза будзе пасаджана ў садзе
папскай летняй рэзідэнцыі. Святы Пасад ўступіў у валоданне вілы сям’і Барберыні
ў 1929 годзе: Пій XI дакупіў гэты маёнтак на суседнім баку гары Альбана спецыяльна
для сельскагаспадарчай дзейнасці, каб падкрэсліць, што Касцёл надае вялікую важнасць
сельскагаспадарчым работнікам. Зараз пад сад, гарод і жывёлагадоўчую ферму з 25 каровамі
і куратнікам адзведзена 20 гектараў . З ураджаю аліўных дрэў б’ецца масла – ад дзесяці
да пятнаццаці цэнтнераў ў год; да таго ж да стала Пантыфіка падаецца свая садавіна,
гародніна і круглы год – кветкі, бо ў Кастэль Гандольфа ёсць і цяпліца. Частка
прадукцыі пастаўляецца ў супермаркет Ватыкана. Магчыма, патрапіць туды і мёд, першы
ўраджай якога сабраны ўпершыню. Восем вулляў з паўмільёнам пчол былі падораны Бэнэдыкту
XVI летась. “У гэтым годзе мы толькі сабралі першы мёд, пераважна з нектара каштанаў
і іншых фруктовых дрэў у гаспадарцы”, - расказалі журналістам пчаляры. Слоікі
з гэтым мёдам адразу сталі экспанатам агравыставы “Колеры біяразнастайнасці”, якая
23 верасня адкрываецца ў Кастэль Гандольфа.