Benedikti XVI ipeshkvijve francezë: mbrojtja e familjes nuk është veprim i prapambetur,
por profetik
Kisha është e thirrur ta mbrojë familjen e martesën nga çdo lloj manipulimi të së
vërtetës, që u takon: kështu u tha sot Papa, grupit të ipeshkvijve francezë, të cilët
i priti në Kastel Gandolfo, me rastin e vizitës së tyre “ad Limina” në Vatikan. Benedikti
XVI u ndal edhe në rolin e laikëve në Kishë e në rreziqet e ‘burokratizimit’ të skajshëm
të baritorisë në dioqeza: “Të mbrosh jetën
e familjen në shoqëri nuk është aspak veprim i prapambetur, por profetik, sepse kjo
ndihmon të promovohen ato vlera, që mundësojnë zhvillimin e plotë të njeriut, krijuar
në përngjasim e shembëlltyrë me Zotin”. E më pas, duke cituar Nxitjen Apostolike
pas-sinodale “Sacramentum Caritatis”, Ati i Shenjtë theksoi: “Të mirat, që
Kisha dhe krejt shoqëria presin nga martesa e nga familja e themeluar mbi të, janë
tepër të mëdha, për të mos u impenjuar me fund në këtë fushë të veçantë baritore.
Martesa dhe familja janë institucione, që duhen promovuar e mbrojtur nga çdo mëdyshje
mbi të vërtetën e tyre, sepse çdo dëm, që u bëhet atyre është në fakt, plagë që i
hapet bashkëjetesës njerëzore”. Benedikti XVI foli për jetën e bashkësive
të krishtera, duke vënë në dukje se zgjidhja e problemeve baritore dioqezane nuk mund
të kufzohet vetëm në çështjet organizative: “Ka rrezik, që të vihet theksi
vetëm në kërkimin e efikasitetit, me një lloj ‘burokratizimi të baritorisë’, që përqendrohet
tek strukturat, tek organizimi e tek programet, të cilat mund të përdoren si të ishin
pronë ekskluzive e anëtarëve të këtyre strukturave”. Kjo, vazhdoi Papa, ndikon
pak, sidomos në jetën e të krishterëve, që nuk shkojnë rregullisht në kishë. Por,
ungjillëzimi kërkon takimin me Zotin, dialogun e rrënjosur në lutje. E këtu, bëhet
i rëndësishëm roli i laikëve: “Është e nevojshme të vigjëlohet për respektimin
e ndryshimeve ndërmjet meshtarisë së përbashkët të të gjithë besimtarëve dhe meshtarisë
së të shuguruarve. Ndryshimi nuk është në grada, apo nivele, por në natyrë… Është
e rëndësishme që bashkëpunimi ndërmjet laikëve dhe meshtarëve të realizohet në kuadrin
e bashkimit kishtar përreth ipeshkvit, që është garanti i tij”. Në fund, Benedikti
XVI përmendi udhëtimin e tij apostolik në Francë, në vitin 2008, gjatë të cilit nënvizoi
se rrënjët e krishtera të vendit janë baza, mbi të cilën duhen mbështetur përpjekjet
për ungjillëzimin e ri.