՝՝Թուրքերը Կը Հասկնան, Թէ Ցեղասպանութեան Ուրացումը Կը Սպառէ Երկիրը՝՝ . Արտայայտութիւնը՝Ֆեթհիէ
Չեթին-ի ։
«Հայ-թրքական սահմանը Հայաստանի կողմէ բաց է, սակայն Թուրքիա կը շարունակէ փակ պահել
զայն: Սահմանի բացման հարցով թրքական կառավարութիւնը գործնապաշտ մօտեցում ունի, իսկ ատրպէյճանական
իշխանութիւնները բացասական ազդեցութիւն ունին», ըսած է հայկական արմատներ ունեցող թուրք
իրաւաբան, գրող եւ մարդկային իրաւունքներու պաշտպան Տիկին Ֆեթհիէ Չեթին: «Այնուամենայնիւ,
ես լաւատես եմ սահմաններու բացման հաւանականութեամբ: Ես կ՛երազեմ, որ օր մը մարդիկ պիտի
կտրեն պատնէշները եւ երկու ժողովուրդները պիտի կարենան բանալ սահմանը» (աւելցուցած է
ան): Թուրքիոյ կառավարութիւնը կը շարունակէ քօղարկել Հայոց Ցեղասպանութեան հանգամանքները
եւ իրականացնել մերժողական ու ժխտողական քաղաքականութիւն: «Պետութեան վարած քաղաքականութեան
պատճառով՝ թուրքերը դեռ երկար ժամանակ պիտի շարունակեն հերքել անհերքելին: Թէեւ կը կարծեմ,
որ անոնք արդէն հասկցած են, որ այդ քաղաքականութիւնը արդիւնք չի տար, եւ արդէն ստիպուած
են որոշ քայլերու նախաձեռնելու: Զանոնք կը խանգարէ մեծ պետական ուժ մը, որ տակաւին կը
յամառի եւ թոյլ չի տար անոնց, որ ընդունին Հայոց Ցեղասպանութիւնը», ըսած է Չեթին:
Անդրադառնալով
այն հարցին, թէ ինչպէ՞ս կրնայ հաշտեցնել իր երկու՝ հայ եւ թուրք ինքնութիւնները՝ գրողը
ըսած է. «Ես ունիմ ոչ թէ երկու, այլ աւելի շատ ինքնութիւններ. ես աշխարհի քաղաքացի եմ:
Եւ երբ ցեղային յարձակում կը կատարուի աշխարհի որեւէ կէտի մէջ, ատիկա կը վնասէ իմ ինքնութեանը»: ֆեթհիէ
Չեթին-ին համաշխարհային ճանաչում բերաւ իր «Մեծ Մայրս» գիրքը, ուր ան կը պատմէ իր հայ
մեծ մօր եւ անոր կրած տառապանքներուն մասին: