Ֆրանսահայ Համայնքը Բողոքի Ցոյցով Կը Դիմաւորէ Ալիեւը։
Ֆրանսահայութիւնը այսօր բողոքի հսկայ ցոյց մը կը կատարէ Ազրպէյճանի նախագահ Իլհամ Ալիեւի
դէմ: Ալիեւին «Բարի Գալուստ» մաղթելու բողոքի ցոյցը տեղի կ՝ ունենայ երեկոյեան
Փարիզի ազրպէյճանական դեսպանատան դիմաց: Պէտք է աւելցնել, որ նախանցեալ գիշեր Ազրպէյճանի
դեսպանատան պատերուն եւ անոր մուտքին գետնին վրայ ներկերով եւ ֆրանսերէնով գրուեցան «Ալիեւ
Ոճրագործ» բառերը: Նշենք, որ Ալիեւ պաշտօնական այցելութեամբ Ֆրանսա կը գտնուի եւ այսօր
ներկայ պիտի գտնուի «Լուվր»-ի թանգարանին մէջ իսլամական արուեստին նուիրուած ցուցահանդէսին
բացումին: Իսկ Յարութ Սասունեան «Քալիֆորնիա Քուրիըր» թերթի հրատարակիչ եւ խմբագիրը,
այս նիւթի կապակցութեամբ գրած իր յօդուածին մէջ կ՝ըսէ որ ՝՝ֆրանսահայերը Ազրպէյճանի
ղեկավարը պէտք է դիմաւորեն պաստառներով, պատկերելով զայն իբրեւ «Կացինաւորներու Պարագլուխ»
(«Bash baltaji»)` արիւնոտ կացինը ձեռքին: Հետաքրքրական է այն, որ երեք լեզուներով
ալ` ազրպէյճաներէն, հունգարերէն եւ թրքերէն, «balta» կը նշանակէ կացին: Բողոքի ընթացքին
ֆրանսահայերը պէտք չէ իրենց ուժերը վատնեն անիմաստ կարգախօսներ` «Ամօ՛թ Պաքուին» կամ
«Ամօ՛թ Հունգարիոյ» գոռալով: Անոր փոխարէն` անոնք պէտք է հանդէս գան վճռական ուղերձով
մը, թէ Արցախը պէտք է ճանչցուի որպէս անկախ պետութիւն, որովհետեւ արցախահայութիւնը չի
կրնար գոյատեւել կացինահարող մարդասպաններ փառաբանող բռնատիրական վարչակարգի մը լուծին
տակ: