Mesha e Papës në Bejrut: Zoti u dhashtë paqen Sirisë dhe Lindjes së Mesme. Të pranishëm,
350 mijë besimtarë
Në praninë e 350 mijë besimtarëve, ndër të cilët edhe Presidenti i Republikës, Mishel
Sulejman, Papa u dorëzoi Nxitjen Apostolike pas-sinodale "Kisha në Lindjen e Mesme",
Patrikëve dhe ipeshkvijve të rajonit, pasi ua kishte dhënë edhe autoriteteve, në takimet
e ndryshme të djeshme. Mesha e paradites së sotme qe prekëse jo vetëm për këtë ngjarje
të rëndësishme, por edhe për praninë e meshtarëve dhe të besimtarëve të vendeve si
Siria, përgjakur nga dhuna e lufta. Pikërisht popujve të vuajtur të Lindjes së Mesme
iu drejtua Benedikti XVI, i cili gjatë Lutjes së Engjëllit të Tënzot, bëri një thirrje
të fuqishme për paqen. Zoti u dhashtë Libanit, Sirisë dhe Lindjes së Mesme “dhuratën
e paqes së zemrave, uljen e heshtjen e armëve dhe ndalimin e çdo dhune”, e ngriti
zërin Ati i Shenjtë para lumit të njerëzve, mbledhur në City Center Waterfront të
Bejrutit, që s’është tjetër, veçse zona portuale e qytetit: “I bëj thirrje
bashkësisë ndërkombëtare! U bëj thirrje vendeve arabe që, si vëllezër, të propozojnë
zgjidhje të pranueshme, të cilat të respektojnë dinjitetin e çdo njeriu, të drejtat
dhe fenë e tij!” Pritja që iu bë fjalëve të Papës ishte emocionuese. Një det
me flamuj të Vatikanit e të Libanit, valëviteshin para elterit, që kishte për sfond
një kedër gjigant, simbol i vendit. Pranë elterit, ullinj, simbole të paqes. “Ju –
u tha Papa libanezëve në Lutjen e Engjëllit të Tënzot – e njihni mirë tragjedinë e
konflikteve e të dhunës, që sjell sa e sa vuajtje”. Fatkeqësisht, shtoi Benedikti
XVI, “kërcëllimi i armëve vazhdon të dëgjohet, ashtu si britma e vejushave dhe e jetimëve!”: “Kush
dëshiron të ndërtojë paqen, nuk duhet të shohë tek tjetri një të keqe, që duhet eliminuar.
Nuk është e lehtë të shohësh tek tjetri një person për t’u respektuar e dashur, por
kjo duhet bërë, nëse dëshirojmë të ndërtojmë paqen, nëse duam vëllazërim… pavarësisht
nga origjina e bindja fetare”. Para Lutjes së Engjëllit të Tënzot, siç e thamë,
Papa kremtoi Meshën për dorëzimin e Nxitjes Apostolike “Kisha në Lindjen e Mesme”,
së bashku me Patrikët e ipeshkvijtë e rajonit. Meshë në latinisht, e pasuruar me këngë
të riteve të ndryshme lindore e me lexime në arabisht, greqisht e armenisht. Në homeli,
Benedikti XVI nënvizoi se vetëm ata, që pranojnë ta ndjekin Jezusin në udhën e Tij,
pranojnë të jetojnë në bashkim me Të në grupin e dishepujve, mund të jenë vërtet të
vetëdijshëm për historinë dhe ngjarjet e saj. Krishti u tha dishepujve se do të vuante
e do të vdiste, për t’u dhënë atyre të kuptojnë se Ai është Mesia i vuajtur, Mesia
shërbëtor e jo ndonjë çlirimtar politik i gjithpushtetshëm: “Të ndjekësh Jezusin
në udhën e Vet, do të thotë të marrësh kryqin tënd për ta shoqëruar në këtë rrugë.
Një udhë jo e lehtë, që nuk është ajo e pushtetit, ose e lavdisë tokësore, por ajo
që domosdoshmërisht, çon drejt vetëmohimit, drejt humbjes së jetës për Krishtin dhe
Ungjillin, me qëllim shpëtimin e saj”. Vendimi për ta ndjekur Jezusin, vazhdoi
Papa, kërkon një intimitet gjithnjë e më të madh me Të, duke ia dëgjuar Fjalën, nga
e cila marrim frymëzim. Pikërisht në këtë vazhdë, Benedikti XVI përmendi Vitin e Fesë,
që do të fillojë më 11 tetor, një nismë, tha Ati i Shenjtë, për t’u thelluar në fe,
për ta bërë atë më të vetëdijshme e për të forcuar bashkimin tonë me Krishtin e me
Ungjillin: “Thirrja e Kishës dhe e të krishterit është të shërbejë, ashtu siç
ka bërë vetë Zoti, falas për të gjithë, pa dallim… Çfarëdolloj detyre në Kishë është,
para së gjithash, shërbim për Zotin e për vëllezërit”. Kjo frymë, vazhdoi Ati
i Shenjtë, duhet të karakterizojë të gjithë të pagëzuarit, sidomos në ndihmën që ata
u japin më të varfërve, më të braktisurve, më të vuajturve. Kështu, theksoi akoma
Papa, t’i shërbesh drejtësisë e paqes në një botë të dhunshme është jo vetëm urgjente,
por e domosdoshme për ndërtimin e një shoqërie vëllazërore. E në fund tha: “Të
dashur vëllezër e motra, i lutem veçanërisht Zotit që t’i japë këtij rajoni të Lindjes
së Mesme shërbëtorë të paqes e të pajtimit, që të gjithë të mund të jetojnë paqësisht
e me dinjitet”. Kjo është edhe dëshmia, që duhet të japin të krishterët e këtyre
trojeve, duke bashkëpunuar për paqen me të gjithë njerëzit vullnetmirë. Pastaj, Papa
dorëzoi Nxitjen Apostolike pas-sinodale, me këto fjalë: “Të dashur vëllezër
e motra të Libanit e të Lindjes së Mesme! Uroj, që kjo Nxitje të jetë udhërrëfyese
për të ecur përpara në rrugët shumëformëshe e të ndërlikuara, ku ju paraprin Krishti.
U përforcoftë feja, shpresa e dashuria në vendet tuaja e në çdo bashkësi për ta bërë
kështu, të besueshme dëshminë tuaj për Hyjin, i cili u bë i afërt me çdo njeri!” E
më pas shtoi: “E dashur Kishë e Lindjes së Mesme, merr jetë nga limfa e veçantë
e Shëlbimit, që u realizua në këtë Tokë unike e të dashur mbi të tjerat! Ec përpara
në gjurmët e etërve të fesë, që me këmbënguljen dhe besnikërinë e tyre, i hapën rrugën
përgjigjes së njerëzimit për Zbulesën e Hyjit!” Homelinë e meshës, Papa e përfundoi
me urimin që Ungjilli të vazhdojë të dëgjohet në Lindjen e Mesme, ashtu si 2000 vjet
më parë e, të jetohet sot e përgjithmonë.