“Mos ki frikë, o grigjë e vogël e Lindjes së Mesme”: Papa nënshkruan Nxitjen Apostolike
pas-sinodale dhe u jep zemër të krishterëve të rajonit
Entuziazëm i jashtëzakonshëm për ditën e parë të vizitës së Papës Benedikti XVI në
Liban, i cili filloi sot udhëtimin e tij të 24-të apostolik, që do të vazhdojë deri
të dielën. Pika kulmore e ditës së sotme qe pa dyshim, nënshkrimi i Nxitjes Apostolike
pas-sinodale “Kisha në Lindjen e Mesme”, në Bazilikën greko-melkite të Shën Palit
në Harisa, rreth 30 km larg Bejrutit, jo vetëm në praninë e Patrikut Gregorios
III Laham, të presidentit të Republikës, të ipeshkvijve të Libanit, të Këshillit të
veçantë për Lindjen e Mesme të Sinodit të Ipeshkvijve, por edhe në praninë e një delegacioni
ortodoks e të një delegacioni mysliman. Ati i Shenjtë nuk mungoi ta përmendë
këtë detaj, gjatë fjalës së tij, duke e cilësuar si shenjë të rëndësishme për krejt
Lindjen e Mesme, ku bashkëjetesa ndërmjet feve nuk është e lehtë, edhe sot e kësaj
dite. Nënshkrimi i dokumentit pas-sinodal përkon me Festën e Lartimit të Kryqit, origjina
e së cilës është pikërisht në Lindje, në vitin 335, të nesërmen e Kushtimit të Bazilikës
së Ringjalljes, ndërtuar mbi Golgotë e mbi varrin e Zotit tonë Jezu Krisht nga perandori
romak Kostandini, që nderohet si shenjt në këto troje. Atij iu duk monograma e Krishtit,
dy shkronjat e para të fjalës Kristòs, ndërsa një zë i thoshte: “Me këtë shenjë, do
të fitosh!” E Benedikti XVI theksoi se Nxitja Apostolike duhet lexuar e interpretuar
në dritën e festës së sotme: “Ekziston një lidhje e pazgjidhshme ndërmjet Kryqit
dhe Ringjalljes, që nuk mund të harrohet nga të krishterët. Pa këtë lidhje, lartimi
i Kryqit do të kishte kuptimin e justifikimit të vuajtjes e të vdekjes, pa parë tjetër
në to, përveçse fundit fatal. Për të krishterin, lartimi i Kryqit do të thotë të komunikosh
me gjithësinë e dashurisë pa kushte të Zotit për njeriun. Bën kështu, një akt feje!
Lartimi i Kryqit, në perspektivën e Ringjalljes, do të thotë të duash ta jetosh e
ta shfaqësh gjithësinë e kësaj dashurie. Bën kështu, një akt dashurie! Lartimi i Kryqit
të çon drejt impenjimit për arritjen e bashkimit vëllazëror e kishtar, burim i dëshmisë
së vërtetë të krishterë. Bën kështu, një akt shprese!” Me pasion të veçantë,
Papa përshkroi gjendjen aktuale në Lindjen e Mesme, vështirësitë e shpresat e të krishterëve,
që u diskutuan edhe në Sinodin e ipeshkvijve në Vatikan, në tetor 2010. Si të mos
e falenderojmë Zotin, tha Benedikti XVI, për guximin e dëshmisë suaj, për solidaritetin,
për faktin se e mbani gjallë flakën e dashurisë, që mbolli në këto troje Biri i Mishëruar
i Hyjit? Nxitja pas-sinodale “Kisha në Lindjen e Mesme” reflekton për të tashmen,
duke menduar të ardhmen, mbi të cilën përpiqet të hedhë pikërisht vështrimin e Krishtit.
Të gjitha rekomandimet e saj, nga thellimi shpirtëror e kishtar, nga rinovimi liturgjik
e katekistik, tek ftesa për dialog, synojnë t’i ndihmojnë të krishterët të ndjekin
Krishtin, në një situatë shpesh të dhimbshme e të vuajtur, ku tundohen ta harrojnë
Kryqin e Tij të lavdishëm: “Por është pikërisht tani - nënvizoi me forcë Papa
– që duhet të kremtojmë fitoren e dashurisë mbi urrejtjen, të faljes mbi hakmarrjen,
të shërbimit mbi dominimin, të përvuajtërisë mbi mendjemadhësinë, të bashkimit mbi
ndarjen. Në dritën e festës së sotme e në funksion të zbatimit të frytshëm të Nxitjes
Apostolike, ju ftoj të gjithëve të mos kini frikë, të mbeteni me të vërtetën e të
kultivoni pastërtinë e fesë. Kjo është gjuha e Kryqit të lavdishëm!” Benedikti
XVI bën thirrje të veprohet konkretisht për t’i ndihmuar Kishat të reflektojnë mbi
bukurinë e bashkësive të para të krishtera, por edhe për të mos lejuar diskriminimin
e të krishterëve, që ata të mund ta jetojnë lirisht e hapur fenë në Krishtin e kryqëzuar,
të vdekur e të ringjallur për shëlbimin e të gjithëve. Nxitja Apostolike pas-sinodale,
vërejti Ati i Shenjtë, kërkon një dialog të vërtetë ndërfetar, bazuar në fenë në Zotin
e vetëm, Krijues të botës dhe, kontribuon në një ekumenizëm të apasionuar njerëzor,
shpirtëror e bamirës, me bazë të vërtetën dhe dashurinë ungjillore. Benedikti XVI
kujtoi se do t’ua dorëzojë atë të dielën të gjithë ipeshkvijve e në fund të fjalës
së tij, para nënshkrimit të Nxitjes Apostolike për Lindjen e Mesme, duke cituar shën
Lukën Ungjilltar, sërish ngriti zërin në këtë thirrje: “’Mos kij frikë, o grigjë
e vogël’(Lk 12,32) e kujto premtimin, që iu bë Kostandinit: ‘Me këtë shenjë, ti do
të fitosh’. Kisha të Lindjes së Mesme, mos kini frikë, sepse Zoti është vërtet me
ju deri në fundin e botës! Mos kini frikë, sepse Kisha universale ju shoqëron me afërsinë
e saj njerëzore e shpirtërore!”. E duke ia besuar popullin libanez e të gjithë
Lindjen e Mesme Virgjërës Mari, Papa përfundoi: “Zoti iu dhashtë të gjithë
popujve të Lindjes së Mesme mundësinë për të jetuar në paqe, në vëllazërim e në liri
fetare. Zoti ju bekoftë të gjithëve”.