Benedikti XVI në audiencën e përgjithshme: e keqja duket e gjithpushtetshme, por Zoti
bën të fitojë e mira
Papa Benedikti XVI vazhdoi sot reflektimin e tij mbi Librin e Zbulesës së Shën Gjonit,
në katekizmin e audiencës së përgjithshme, mbajtur në Sallën Pali VI në Vatikan. “Zoti
nuk është i pandjeshëm ndaj lutjeve tona”, nënvizoi Ati i Shenjtë, duke kujtuar premtimin
e Ungjillit se “e keqja nuk do të ngadhnjejë mbi të mirën”. Në botë, vërejti Papa,
ka të këqia, që bëhen nga njeriu, si dhuna, e cila lind nga dëshira për të pasur gjithçka,
për të qenë mbi të tjerët, aq sa arrijmë ta vrasim njëri-tjetrin; ose si padrejtësia,
sepse njerëzit nuk respektojnë ligjet. Këtyre u shtohen sëmundjet, vdekja, uria… por,
theksoi Benedikti XVI, para 8 mijë besimtarëve të pranishëm, nuk duhet humbur kurrë
shpresa, pasi i Keqi duket i gjithpushtetshëm, por i tillë është vetëm Zoti, që ia
ndryshon planet. Libri i Zbulesës, vazhdoi Ati i Shenjtë, është plot me simbole,
ndër të cilat “froni”, ku ulet Hyji, që ndërhyn në histori, në mënyrë të mistershme,
por reale; pastaj “libri”, i cili përmban planin e pashqyrtueshëm të Zotit për ngjarjet
e për njerëzit; e më tej “Qingji”, Krishti i vdekur e i ringjallur, i aftë të na e
zbulojë “planin e Zotit, kuptimin më të thellë të historisë”: “Kisha jeton
në histori, nuk mbyllet në vetvete, por përballon me guxim udhën e vet në mesin e
vështirësive e të vuajtjeve, duke pohuar me forcë se e keqja nuk fiton mbi të mirën,
se errësira nuk e zbeh shkëlqimin e Hyjit”. Është një e vërtetë e rëndësishme,
vazhdoi Papa, prandaj: “…si të krishterë nuk mund të jemi kurrë pesimistë;
e dimë mirë se në udhën e jetës ndeshemi shpesh me dhunën, gënjeshtrën, urrejtjen,
persekutimin, por kjo nuk na çkurajon”. E është sidomos lutja, nënvizoi Benedikti
XVI, që na edukon të shohim shenjat e Zotit, praninë dhe veprimin e Tij; na nxit të
jemi ne vetë drita e së mirës, e cila përhap shpresë e dëshmon se fitorja është e
Hyjit”: “Duhet të jemi të sigurtë, pra, se nuk ekzistojnë lutje sa për të thënë,
të padobishme; asnjëra prej tyre nuk humbet”. Të gjitha lutjet tona, i siguroi
besimtarët Ati i Shenjtë, pavarësisht nga kufizimet, pavarësisht nga lodhja, varfëria,
shterpësia, papërsosmëria, që mund të kenë brenda, arrijnë pa dyshim, në zemrën e
Zotit: “Zoti nuk është i pandjeshëm ndaj lutjeve tona, ndërhyn dhe bën të dëgjohet
fuqia dhe zëri i Tij mbi tokë, e bën të dridhet dhe e shkatërron sistemin e të Keqit.
Shpesh, para së keqes, ndjejmë se nuk mund të bëjmë asgjë, por është pikërisht lutja,
përgjigjia e parë dhe më e frytshme, që mund të japim. Ajo e përforcon impenjimin
tonë të përditshëm për të përhapur të mirën. Pushteti i Hyjit e bën të frytshme brishtësinë
tonë”.