Ministri Jashtëm Hoxhaj: Fundi i mbikëqyrjes flet për një Kosovë demokratike
Ministri i Jashtëm kosovar, Enver Hoxhaj, sot në Prishrtinë gjatë një konference
"Kaptinë e mbyllur në Ballkan", tha se, "në këtë moment përfundimi i mbikëqyrjes së
pavarësisë dëshmon se Kosova nuk është më një zonë e ndjeshme dhe se vlerat e demokracisë
liberale mund të prevalojnë me një përkushtim të fuqishëm të komunitetit ndërkombëtar". Ministri
i Jashtëm Hoxhaj, duke u ndalur rreth prioriteteve të Kosovës në të ardhmen, tha se
ato janë, modernizimi i shtetit, bërja e Kosovës konkurruese me shtetet e rajonit
dhe Evropës, përmirësimi dhe reformimi i situatës ekonomike, integrimi në institucionet
euroatlantike, lëvizja pa viza për qytetarët tanë dhe studimi i fizibilitetit, adresimi
i situatës në komunat veriore dhe procesi i normalizimit të raporteve me Serbinë. "Ne
mbesim plotësisht të përkushtuar që të jemi eksportues të paqes, stabilitetit dhe
prosperitetit duke kontribuuar aktivisht si një anëtar kredibil dhe i respektuar i
komunitetit ndërkombëtar. Axhenda kryesore e institucioneve tona, së bashku me stabilitetin
politik dhe zhvillimin ekonomik është anëtarësimi në Bashkimin Evropian", tha ministri
kosovar Emver Hoxhaj.