Mesazhi i Benediktit XVI Takimit të parë mbi veprimtarinë e Kishës rrugëve në Afrikë
e Madagaskar: të mbrohen dinjiteti e të drejtat e njeriut
Mesazhi i Benediktit XVI Takimit të parë mbi veprimtarinë e Kishës rrugëve në Afrikë:
le të mbrohet çdo jetë njerëzore që rrezikohet. Në Dar-Es-Salaam të Tanzanisë,
dje pasdite u hapen punimet e Meetingut të parë mbi veprimtarinë baritore të Kishës
kushtuar rrugës në Afrikë e në Madagaskar, organizuar nga Këshilli Papnor për Baritorinë
e Emigrantëve dhe të Endacakëve. Në fillim të punimeve u lexua mesazhi i Papës Benediktit
XVI, dërguar kryeipeshkvit të Dar-Es-Salaam, kardinalit Polycarp Pengo nga Sekretari
i Shtetit të Vatikanit, kardinali Bertone. Benedikti XVI – lexohet në letër – beson
se “ nga ky takim do ketë një bashkëpunim më të madh e një koordinim të të gjitha
përpjekjeve ndërmjet Kishave, posaçërisht në mbrojtje të çdo jete njerëzore që rrezikohet
nëpër rrugët dhe nëpër udhët e Afrikës”. Papa kërkon t’u kushtohet një vëmendje
e veçantë “kërkesave baritore që kanë gratë e fëmijët që gjenden të flakur nëpër rrugë
” për arsye shoqërore, ekonomike e politike apo pse janë viktima të shfrytëzuesve
të organizuar në nivelet kombëtare e ndërkombëtare. Ati i Shenjtë Jozef Ratcinger
ka besim të madh tek ky takim kishtar ku do të shqyrtohen ato “situata që ndikojnë
në jetën e atyre njerëzve që udhëtojnë në kërkim të një pune, duke u ballafaquar me
shumë rreziqe të mëdha gjatë udhëtimeve të pasigurta”, një kërcënim ky që në Afrikë
ekziston për miliona njerëz. Në tekst të letrës së Papës nënvizohet më tej edhe
tema e këtij Meetingu “Jezusi personalisht iu afrua e udhëtonte me ta” që evokon praninë
ngushëlluese të Krishtit të Gjallë ndërsa po i shoqëronte dishepujt në udhën e Emausit.
Ai iu afrua e eci bashkë me ta. “Edhe sot Krishti Shpëtimtar vazhdon ta shoqërojë
Kishën e vet e, përmes saj, mbarë njerëzimin në shtigjet e jetës e të historisë, duke
hapur mendjet e zemrat ndaj së vërtetës shpëtimprurëse të Ungjillit e duke u dhënë
guxim e paqe të gjithë atyre që ndjehet të vagëlluar, të çorientuar, të përhumbur
apo të lënduar gjatë ecjes udhës së tyre tokësore”. Sipas disa statistikave, që
sjell agjencia Fides, në Afrikë mase 50 milion fëmijë janë nëpër rrugë. 40% pa shtëpi,
60% punon rrugëve për të mbajtur familjen. Më shumë se një miliard njerëz të planetit
nuk kanë strehim të përshtatshëm. Pasojat janë dramatike. Sot, afër 50 mijë njerëz,
pjesa më e madhe e të cilëve janë gra e fëmijë, vdesin për shkaqe të kushteve të papërshtatshme
të strehimit e të banimit. Shkaqet kryesore që i detyrojnë gratë e fëmijët të jetojnë
rrugëve janë varfëria, mjerimi, dhuna familjare, konfliktet fisnore e civile dhe kriminaliteti
i organizuar.