Mesazhi i Papës hapi në Sarajevë, takimin botëror të feve, organizuar nga bashkësia
e Shën Egjidit
Mashtrimit të kulturës së konfliktit t’i përgjigjet vlera e dialogut, që bazohet në
binarët e qëndrueshëm të së vërtetës, nga e cila lind paqja. Kështu shkruhet në mesazhin
e Papës, që mban firmën e kardinalit Tarçizio Bertone, Sekretar i Shtetit të Vatikanit
e që i drejtohet kryeipeshkvit të Sarajevës, kardinalit Vinko Puljiç, për hapjen e
takimit ndërmjet feve, organizuar nga Bashkësia e Shën Egjidit, pikërisht në qytetin
boshnjak. Takimi i përvitshëm “Njerëz dhe fe”, që këtë vit ka për temë “Bashkëjetesa
është e ardhmja”, filloi dje e do të përfundojë nesër. Në të marrin pjesë përfaqësues
të të gjithë feve nga zona e Ballkanit, por edhe më gjerë. Janë mbledhur në Sarajevë,
20 vjet pas rrethimit të njohur të qytetit nga forcat serbe, që shkaktoi mëse 12 mijë
viktima, nga 5 prilli 1992 deri më 29 shkurt 1996. Instrumentalizimi i fesë për
të justifikuar dhunën dhe mospranimi i Zotit, në emër të një botëkuptimi krejtësisht
të shekullarizuar mbi njeriun, vë në rrezik paqen, thekson Papa në mesazh. Benedikti
XVI vë në dukje se prova për ç’mund të bëjnë këto dy forca negative gjendet pikërisht
në Sarajevë, ku lufta e 20 vjetëve më parë solli veç vdekje e shkatërrim. Paqja, vazhdon
Ati i Shenjtë, “ka nevojë të mbështetet nga mendje e zemra, që e kërkojnë të vërtetën,
që e lejojnë Zotin të veprojë në to dhe u shtrijnë dorën të tjerëve”. Kërcënimi i
terrorizmit vazhdon e po kështu, edhe luftrat, që përgjakin botën, e cila ka gjithnjë
e më shumë nevojë për paqe. Papa flet për Lindjen e Mesme, për gjendjen dramatike
në Siri e për udhëtimin e tij në Liban, duke uruar pajtim e qetësi për këto troje.
Bashkëjetesa ndërmjet personave të ndryshëm nuk është e lehtë, vërejti themeluesi
i bashkësisë së Shën Egjidit, Andrea Riccardi, në hapje të takimit. Sarajeva është
emblematike për këtë. Sot, qyteti është simbol i kujtesës së dhimbshme e i mungesës
së pajtimit, rruga drejt të cilit, akoma nuk është gjetur. Prandaj përfaqësuesit e
feve janë mbledhur këto tri ditë pikërisht në këtë qytet boshnjak, pasi nga fetë duhet
të dalë mesazhi i paqes, pasi fetë nuk duhet ta shenjtërojnë luftën, siç kanë bërë
në të kaluarën. Vetëm paqja është e shenjtë, jo lufta, theksoi Andrea Riccardi. Për
Ballkanin, paqja e qëndrueshme kalon nga Bashkimi Evropian. Ky ishte mesazhi i presidentit
të Këshillit Evropian, Van Rompuy. Ai u kërkoi qytetarëve të Sarajevës të mos hakmerren
për të rënët e luftës, të cilët duhen nderuar vetëm duke e kthyer qytetin në fanar
të tolerancës e të përshpirtërisë, për të cilat dallohej dikur. Siç thotë edhe kryetari
i Bashkësisë së Shën Egjidit, Marco Impagliazzo, në mikrofonin tonë: Sarajeva
është qyteti, që hapi dhe mbylli shekullin XX: Lufta I Botërore filloi me pretekstin
e atentatit në Sarajevë, ndërsa shekulli përfundoi me Luftën e Ballkanit e, Sarajeva
ishte një nga qytetet simbol të kësaj lufte. Atëherë, u instrumentalizuan të gjitha
fetë për të nxitur ndeshjen ndërmjet popullsive të shumta, që përbëjnë mozaikun e
Ballkanit. Sot, të jesh në Sarajevë do të thotë të thuash se në shekullin e ri, fetë
s’mund të jenë tjetër, veçse mjeti i paqes dhe shembulli më i mirë për ndërtimin e
një shoqërie të bashkëjetesës paqësore.