Me mbledhjen e fundit të Grupit ndërkombëtar të kontrollit, përfundoi sot me 10 shtator
2012, pas katër vjetësh, mbikqyrja e pavarësisë së Kosovës. Lajmi u dha nga diplomati
holandez Piter Feith, kryetar i Zyrës Civile Ndërkombëtare, i cili foli edhe para
Parlamentit të Prishtinës. Kosova ka tani kontrollin e plotë mbi sovranitetin e
saj, për herë të parë pas 17 shkurtit të vitit 2008, ditë në të cilën shpalli
Pavarësinë, e njohur deri tani, nga 89 vende të tjera. “Është arritje historike”,
komentoi presidenti amerikan Barak Obama. “Me optimizmin, energjinë dhe vendosmërinë
e popullit të vet, Kosova ka bërë përparime të mëdha në konsolidimin e pavarësisë
dhe në ndërtimin e institucioneve të një Shteti modern, shumëetnik, gjithëpërfshirës
dhe demokratik”. Në emër të popullit amerikan, uroj qeverinë, parlamentin dhe popullin
e Kosovës për këtë arritje historike, me të cilën Kosova ndërmerr edhe një hap të
rëndësishëm drejt vendit që i takon, në një Evropë të lirë, të tërësishme dhe paqësore,
thuhet në fund të komunikatës së presidentit amerikan, Barak Obama. Së bashku me
SHBA-të, edhe Gjermania komentoi pozitivisht fundin e periudhës së mbikqyrjes mbi
Kosovën. Zbatimi i reformave, tha nga Berlini, zëdhënësi i qeverisë, Stefen Saibert,
tregon se vendi ka arritur aftësinë për të vetëadministruar, jo vetëm përsa
i përket sferës së sigurisë dhe luftës kundër kriminalitetit e korrupsionit, por edhe
përsa i përket planit të normalizimit të marrëdhënieve me Serbinë. Kjo e fundit shfrytëzoi
rastin për të përsëritur edhe një herë se Beogradi nuk do ta njohë kurrë pavarësinë
e Kosovës, si me, si pa mbikqyrje ndërkombëtare. Deklarata u bë nga kryeministri serb
Ivica Daçiç para se të mblidhej parlamenti i Prishtinës. Në të vërtetë, çfarë
do të ndryshojë për Shtetin më të ri të Ballkanit? Shumë pak. Paqeruajtësit e
NATO-s do të vazhdojnë të jenë përgjegjës për sigurinë dhe misioni i Bashkimit Evropian
do të ketë fjalën e fundit në çështjet ligjore.Tensionet me Serbinë mbeten e, po kështu,
edhe ushtria e të papunëve, të cilët akoma presin të ardhmen e ndritur, që u qe premtuar. Gjithashtu,
Kosova ka himnin dhe flamurin e vet, por ai nuk mund të ngrihet para selive të OKB-së,
pasi Prishtina nuk është anëtare e saj. Atletët kosovarë nuk mundën të marrin pjesë
në Lojërat Olimpike e përpjekja e fundit për të ndërruar prefiksin e telefonave, i
njëjtë me Serbinë, dështoi, pasi vetëm një vend i OKB-së mund të ketë kodin e vet. Bashkimi
Evropian shpreson që Kosova dhe Serbia t’i zgjidhin problemet ndërmjet tyre, në
perspektivën e integrimit evropian. Janë bërë hapa përpara në këtë drejtim. Qytetarët
kosovarë mund të udhëtojnë në Serbi me letërnjoftimin e tyre, por jo me makina me
targë të Kosovës. Serbia i pranon diplomat kosovare të universitetit, nëse ato autentikohen
nga një palë e tretë, por nuk ulet afër delegacionit të Kosovës në mbledhjet rajonale,
me përjashtim të rastit kur emri i saj paraqitet me një notë, që i referohet pozicionit
ndërkombëtar të Prishtinës. Siç tha kryeministri Hashim Thaçi, “mbetet shumë për
të bërë, por gjendja e Kosovës konsolidohet dhe forcohet përditë”.