Papa: në Liban për të përkrahur dialogun, pajtimin e paqen
Nuk mund t’i nënshtrohemi dhunës e acarimit të tensioneve:me këto fjalë dje
në mesditë, gjatë lutjes së Engjëllit të Tënzot në Kastel Gandolfo, Papa Benedikti
XVIfoli për udhëtimin e tij të afërt në Liban. “Do të kem rastin fatlum
për të takuar popullin libanez e autoritetet e tij, përveçse të krishterët e këtij
vendi të dashur e ata të vendeve të afërta. Nuk e injoroj situatën shpesh dramatike
që po përjetojnë popullsitë e këtij rajoni, që tash shumë, madje tepër kohë, janë
sfilitur nga konfliktet e parreshtura”. Kështu u shpreh Papa Benedikti XVI në përshëndetjen
drejtuar në gjuhën franceze besimtarëve të pranishëm për lutjen e Engjëllit të Tënzot,
duke njoftuar për udhëtimin e tij të afërt në Liban, me të cilin rast do të nënshkruajë
Këshillimin apostolik pas-sinodal, fryt i Asamblesë së veçantë të Sinodit të Ipeshkvijve
për Lindjen e Mesme, që u mbajt në tetor të vitit 2010 në Vatikan. Benedikti XVI kujtoi
me fjalë të forta edhe ankthin e shumë njerëzve: “E kuptoj – tha – angështimin
e shumë njerëzve të Lindjes së Mesme, që për ditë janë të zhytur në vuajtje të çdo
lloji, shkaktuar nga fatkeqësi e ngjarje të trishtueshme që çdo ditë sulmojnë jetën
e tyre të përditshëm personale e familjare, e shpesh me sulme edhe vdekjeprurëse”.
Në mënyrë të veçantë i “kujtoi me shqetësim” ata që, “për të kërkuar një hapësirë
të qetë, braktisin jetën e tyre familjare e profesionale dhe përjetojnë pasigurinë
e mërgimit”. E duke iu referuar situatës aktuale, Papa Ratcinger konstaton se “gjetja
e një zgjidhjeje të krizë duket shumë e vështirë”, por ripohon me forcë se “nuk mund
t’i nënshtrohemi dhunës e acarimit të tensioneve”. E Benedikti XVI rekomandon: “Angazhimin
për dialog dhe pajtim që duhet të jenë prioritet për të gjitha palët e përfshira,
e duhet të mbështeten nga bashkësia ndërkombëtare, duke qenë të ndërgjegjshëm përherë
më tepër për rëndësinë që ka paqja e qëndrueshme për mbarë rajonin dhe botën”. “Udhëtimi
im apostolik në Liban, që në saje të përmbajtjes së përmendur i referohet edhe Lindjes
së Mesme, bëhet në shenjë të paqes”, theksoi Papa e duke iu referuar fjalëve të Krishtit
tha: “Ju jap paqen time”.