66 vjetori i kryengritjes antikomuniste të Postribës
Më 9 shtator përkujtojmë kryengritjen Antikomuniste organizuar në Postribë, 66 vjet
më parë. Ishte pra 9 shtatori i vitit 1946, që në Shqipëri shënoi revoltën e parë
antikomuniste e me përmasa të mëdha, pasi në të u përfshinë me armë në dorë burra
të Postribës, Shkodrës, Gurit të Zi, Rrethinave, Oblikës e më gjerë, e kështu u shtri
në një kryengritje të vendosur shqiptare antikomuniste, e cilësuar e para e këtij
në Shqipëri. Një pjesë e protagonistëve të kësaj ngjarje historike për Shqipërinë
dhanë jetën, të tjerë u burgosën, u internuan dhe u persekutuan përgjatë viteve errëta
e mizore të diktaturës komuniste. Kryengritja e Postribës e 9 shtatorit 1946
qe e motivuar dhe e organizuar. Që në fillim postribasit dhe jo vetëm ata ishin të
vetëdijshëm se e ardhmja e tyre nuk ishte komunizmi. Ata e dinin se prona nuk do te
ishte më e tyre, e dinin se komunistët nuk e pranonin besimin fetar në Zotin, i cili
u vërtetua me një përndjekje e tortura të pashembullta, e kështu sakrifikuan jetën
e tyre dhe atë të familjeve. Në kryengritje nuk morën pjesë vetëm një grusht
njerëzish, as vetëm ata që u prekën nga komunizmi, por gjithë populli i zonës, duke
shënjuar kryengritjen e parë antikomuniste në Shqipëri Kur përkujtojmë këtë ngjarje,
vlerësojmë faktin se shqiptarët qenë gjithmonë njerëz e kërkuan lirinë, qenë të parët
që flijuan jetën për liri dhe qenë vërtet sakrificë e madhe e paguar me gjak, me jetë,
me sulme e përndjekje që regjimi komunist i bëri Postribës, Shkodrës, pastaj për ta
mbajtur nën hijen e frikës dhe burgut të gjithë shoqërinë shqiptare, gjithë shqiptarët,
që kaluan një kalvar të tmerrshëm, një periudhë nën errësirë të plotë vlerash antinjerëzore,
antishpirtërore, antimorale e antishqiptare.