Liturgjia e Fjalës së Zotit e dielës së 23-të gjatë vitit ‘B’
Ja në takimin tonë javor me Fjalën e Zotit të së dielës, kësaj here do të dëgjojmë
e meditojmë së bashku, leximet biblike të liturgjisë së Fjalës Hyjnore të dielës së
23-të gjatë vitit kishtar, sipas liturgjisë kishtare.
Hyji i zgjodhi ata që
për sy të botës janë skamnorë për t’i bërë trashëgimtarë të Mbretërisë. Kështu pohon
shën Jakobi në leximin e dytë të kësaj së diele, e pjesa e Ungjillit nga Marku na
tregon se Jezusi ‘hapë’ mundësi të reja të jetës. Fuqia e pushtetit hyjnor, që
askush nuk mund ta arrinte, vet Hyji bëri në mënyrë që përmes Jezu Krishtit njeriu
të mund ta përjetonte atë. Liturgjia e kësaj së diele (Ungjilli) na paraqet një njeri
shurdhmemec, që nuk ishte në gjendje të kërkonte ndihmë e të dëgjonte ndonjë fjalë,
as sa për ngushëllim. Po takimi me Krishtin i dhuron shërimi. Pra është pikërisht
takimi me Jezusin që na bënë më të aftë për të dëgjuar e për të folur, për pranuar
e për të dhuruar, në një komunikim dashamirësie e respekti. Mos të harrojmë se ekzistojnë
edhe shurdhmemec të natyrës shpirtërore. Nëse Hyji është i mirë, pse jetojmë vazhdimisht
përvoja vuajtjeje fizike, morale dhe shpirtërore? Jezusi nuk është një shërues i fuqishëm
dhe shi-kon me dyshim atë që e konsideron një magjistar. Ai ka për zemër jo vetëm
shërimin fizik, por do çlirimin e plotë të njeriut. Ai "e ndau veçmas, larg nga turma".
Nuk ka ndërmend të kryejë një akt madhështor që nxit duartrokitje. Pastaj "i vendos
gishtat në veshë e me pështymë i prek gjuhën". Meqë shurdhmemeci nuk mund të kuptonte
fjalët, Jezusi bën disa gjeste për t’i bërë të kuptoje që ka ndërmend ta shërojë e
që është një dhuratë e madhe të takojë Atë, shumë më para se sa të shërohet. Jezusi
"shikon drejt qiellit", duke shprehur marrëdhënien e tij me Hyjin me vrullin e lutjes.
Dhe "psherëtiu thellësisht": shenjë e pjesëmarrjes së tij personale në vuajtje njerëzore.
Menjëherë shqipton një fjalë "Effatà, domethënë: Hapu!". Ky urdhër nuk u drejtohet
organeve të sëmura (veshë-ve dhe gjuhës), por personit shurdhmemec. Nuk është vetëm
një pjesë e trupit që kuro-het, por gjithmonë i gjithë personi. Shërimi vjen nga fjala
e Jezusit, është një fitore kundër fuqisë së të keqes në të gjitha për-masat e saj.
Edhe mua Jezusi më thotë: hapu për të dëgjuar dhe për të pranuar mësimet e Ungjillit.
Çdo të diel bashkësia jonë mblidhet për tu shëruar nga çdo e keqe, por sidomos mblidhet
për të hapur veshët dhe për të hapur gojën duke kënduar mëshirën e Zotit.
Liturgjia e Fjalës së Zotit
Leximi I nga Is 35,4-7a Isaia
na tregon efektet e pranisë së Hyjit mes njerëzve: pranvera lulëzon, kthehet guximi,
një popull rigjen lirinë e tij, të mërguarit kthehen në atdhe, sytë e të verbrit hapen,
shurdhi mund të dëgjojë, memecit i zgjidhet gjuha. Të gjitha këto Jezusi i kreu duke
na zbuluar dashurinë e Atit.
Lexim prej Librit të Isaisë profet
Thoni
atyre që i ka lëshuar zemra: “Mbahuni! Frikë mos kini! Ja, Hyji juaj! Erdhi hakmarrja!
Ia behi shpagimi i Hyjit! Vetë do të vijë e do t’ju shëlbojë!” Atëherë sytë do t’u
çelen të verbërve, veshët e të shurdhërve do të dëgjojnë; atëherë i shqepti do të
kërcejë si dreri, gjuha e të pagojit do të shpërthejë në hare, se në shkretëtirë do
të burojnë ujërat, përrenjtë do të rrjedhin nëpër shkreti. Toka e shkrumbuar liqen
do të bëhet, vendi i thatë burime! Në strofuj ku strukej çakalli, do të rritet kallam
e xunkth. Fjala e Zotit. Falënderojmë Hyjin.
Zoti e mban besnikërinë
për amshim, u jep të drejtën të nëpërkëmburve, u jep ushqim të uriturve. Zoti
i çliron robërit.
Zoti u jep dritën e syve të verbërve, Zoti i ndreq të
kërrusurit, Zoti i do të drejtët, Zoti i mbron ardhacakët.
U ndihmon
bonjakëve e të vejave, ndërsa mëkatarëve ua pështjellon udhët. Zoti do të mbretërojë
për jetë, Hyji yt, o Sion, nga breznia në brezni.
Leximi dytë nga Jakobi
2,1-5 Jakobi denoncon skandalin e një bashkësie të krishterë që vlerëson më
shumë pozicionet shoqërore të personave në kundërshtim me mësimin e Jezusit. Kisha
e të pasurve interesohet për të varfrit, por vetëm për t’i përdorur si një instrument
për lavdinë e tyre. Nëse kisha mbetet kisha e të pasurve nuk mund t’i dojë të varfrit
me të vërtetë. Për t’i dashur duhet të bëhet kisha e shërbimit, duke imituar themeluesin
e saj, që nga zotëri u bë shërbëtor.
Lexim prej Letrës së shën Jakobit apostull
Vëllezër
të mi, mos e përzini fenë e Zotit tonë Jezu Krishtit të madhërueshëm me krahmbajtje!
Sepse, po bëri e hyri në mbledhjen tuaj një njeri me unazë ari, i veshur në mënyrë
të shkëlqyeshme e, po hyri një skamnor me petka të vjetruara, e ju e rrethoni me nderime
atë që është i veshur bukur dhe i thoni: “Urdhëro! Ti ulu këtu lirisht!”, ndërsa skamnorit
i thoni: “Rri atje, në këmbë!” ose: “Ulu këtu, poshtë, te këmbët e stolit tim!”, a
nuk gjykuat ju në vetvete me krahmbajtje dhe a nuk u bëtë gjykatës që gjykojnë për
së mbrapshti? Dëgjoni, vëllezër të mi të dashur! A nuk i zgjodhi Hyji ata që për
sy të botës janë skamnorë për t’i bërë të pasur në fe dhe trashëgimtarë të Mbretërisë
që ua ka premtuar atyre që e duan? Fjala e Zotit. Falënderojmë Hyjin
Aleluja. Gjithçka
bëri mirë! Ky po bën të dëgjojnë të shurdhët e të flasin memecët! Aleluja.
Ungjilli
Mk 7, 31-37
Jezusi ka shkuar në krahinën pagane të Tirit, sepse farisenjtë,
të shurdhër ndaj Ungjillit e pengonin Jezusin të fliste. Në këtë kontekst kryhet mrekullia
e shurdhit që ka një vlerë simbolike për farisenjtë që janë të shurdhër ndaj mësimit
të Jezusit. Ja misteri i Fjalës së Jezusit që mbyll veshët e atij që nuk do ta dëgjojë,
por zgjidh gjuhën e atij që dëshiron të shërohet.
Leximi i Ungjillit shenjt
sipas Markut Jezusi doli prapë nga krahina e Tirit, e nëpër Sidon, erdhi drejt
detit të Galilesë në krahinat e Dekapolit. Ia sollën një shurdhaman që mezi fliste
dhe iu lutën ta vërë dorën mbi të. Ai e ndau prej popullit veçmas, ia shtiu gishtërinjtë
e vet në veshë, me pështymë të vet ia preku gjuhën, i drejtoi sytë kah qielli, psherëtiu
dhe i tha: “Effatha” – që do të thotë: “Çelu!” E menjëherë iu çelën veshët e iu zgjidh
pengesa e gjuhës dhe foli rrjedhshëm. Jezusi u urdhëroi të mos i tregojnë askujt.
Por, sa më tepër që ai ua ndalonte, ata aq më tepër e shpallnin. Të mrekulluar mbi
çdo masë thoshin: “Gjithçka bëri mirë! Ky po bën të dëgjojnë të shurdhët e të flasin
memecët!” Fjala e Zotit. Lavdi të qoftë ty, o Krisht.
Më
shumë mbi liturgjinë e Fjalës së Zotit të kësaj së diele mund të dëgjoni edhe këtu..............