Benedikti XVI: në Virgjërën Mari Kisha e ka shembullin e thirrjes e të misionit.
Papa Benedikti XVI u takua sot, në Kastel Gandolfo, me pjesëmarrësit e Kongresit të
23-të Mariologjik Ndërkombëtar, që u zhvillua në Romë nga data 4 shtator e deri më
sot, 9 shtator. “Kisha – u tha Papa të pranishmëve – në Marinë e sheh dhe gjen identitetin,
thirrjen dhe misionin e vet, pik referimi për bashkësinë e besimtarëve”. Kongresi
u mbajt në Universitetin Papnor Antonianum të Romës dhe sivjet, pati si temë: “Mariologjia,
duke u nisur nga Koncili II i Vatikanit”. Pjesëmarrësit u lutën së bashku me Atin
e Shenjtë Jozef Ratcinger, që Zoja e Bekuar ta ndihmojë botën dhe Kishën, në këtë
çast të vështirë. Gjatë punimeve u diskutua mbi aspekte të ndryshme mariologjike,
sidomos rreth propozimit të Koncilit të II të Vatikanit, i cili e sheh Marinë në një
këndvështrim trinitar, duke e quajtur “Nënë e Birit të Zotit, bijë e zgjedhur e Atit
dhe tempull i Shpirtit Shenjt”. Reflektimi i Benediktit XVI u nis nga festa e sotme
e lindjes së Marisë Virgjër, për të kaluar pastaj te konteksti i 50-të vjetorit të
Koncilit II të Vatikanit që bie në tetor të ardhshëm, gjatë të cilit muaj Papa Ratcinger
do të përurojë Vitin e Fesë. Ishte Gjoni XXIII, tha Benedikti XVI, ai i cili deshti
që Koncili II i Vatikanit të fillonte punimet më 11 tetor, “në të njëjtën ditë në
të cilën, në vitin 431, Koncili Kishtar i Efezit pat shpallur Marinë ‘Theotokos’,
‘Nënë të Hyjit’. E që në letrën ‘Motu proprio’ me të cilën shpalli Vitin e Fesë, Benedikti
XVI duke u lutur për një “mbrojtje të veçantë gjatë udhës së Kishës, ia besoi Zojës
së Bekuar, shembull i fesë, këtë kohë hiri e bekimi”.