15. Leksionet e Nënë Terezës: “Një lule mbi Varr”. Leksionin e 15-të
e të fundmë nga Nënë Tereza e marrim tek një vend, që tashmë është kthyer në cak shtegtimesh:
një varr, ku 15 vjet më parë zbriste për të pushuar në paqe, trupi i Gruas më të përvuajtur,
e njëkohësisht, më të njohur në mbarë botën. Gruas, që e bëri kombin e vet aq të njohur
sa, po të pohosh se je shqiptar në çdo skaj të humbur të botës, do të pasthirmojnë:
“Ah! Bashkatdhetar i Nënë Terezës”. Gruas, që identifikoi vetveten me Kombin e vet!
Duke e nderuar! Ashtu si pak kush ka ditur ta bëjë deri më sot! Varri i thjeshtë,
që jemi nisur ta vizitojmë, na kujton se figura e Nënë Terezës është ndër më të nderuarat,
por edhe ndër më të diskutuarat, ndërmjet shenjtorëve të kohëve moderne; e po aq,
edhe ndërmjet atyre, që merituan Çmimin Nobel për Paqen. Arrijmë jo pa vështirësi
tek Varri, që ndodhet në selinë numër 54/A, në një nga rrugicat në zemër të një lagjeje
jashtëzakonisht të ndërlikuar të Kalkutës. Këtu vizitojmë një muze të vogël e
më pas, duke kaluar në sallën aty pranë, gjunjëzohemi pranë varrit të Nënë Terezës. Mund
ta filmojmë e ta fotografojmë varrin, por jo motrat, në sa flasin, e as dhomëzën e
Nënës, që ruhet ashtu siç ishte, kur Ajo jetonte e punonte këtu. Ashtu si shumica
e shtegtarëve dhe e turistëve, lëmë një lule mbi atë varr të vogël, që të kujton punë
aq të mëdha. Gjest i domosdoshëm, për të shprehur admirimin për Gruan, që shkriu
gjithë jetën duke mjekuar Krishtin e gërbulur, të flakur në rrugët e botës, të braktisur,
të harruar, të mbuluar me plagë e me krimba, në agoni! E që, megjithatë, nuk mundi
t’u shpëtojë polemikave. Një lule, për Nënën e të mjerëve më të mjerë. Një
lule për Nënën e njerëzve të mohuar. Një lule Nënës, që diti të shuajë etjen e
Krishtit për dashuri. Një lule për Nënën e të gjithë shqiptarëve! Një lule për
murgeshën katolike, që u bë nënë e mijëra fëmijëve pa nëna, të cilët diti si moskush
t’i rrokë e t’i përkëdhelë. Një lule për atë, që shkeli në shtigje tejet të thepisura,
me sarin e thjeshtë e sandalet simbolike, gjysmë të shkatërruara nga udha e gjatë. Një
lule për Nënën, që u akuzua deri se gaboi shpesh e edhe se mblodhi miliona. Një
lule për atë, që sigurisht milionat nuk i mori me vete në varr. Një lule mbi rrasën
e mermertë të Asaj, së cilës i pëlqente të përsëriste shpesh: “S’ka pikë rëndësie
nëse të shajnë: pranoji sharjet duke vënë paksa buzën në gaz e
shko e vijo punën tënde!”. E ky është edhe leksioni, që na jep Nënë
Tereza ditën kur përkujtojmë fundin e shtegtimit të saj mbi tokë. Ky leksion na
kujton se kur vdes ndonjë personalitet i shquar shekullar, në vend të tij ulet menjëherë
një tjetër. Madje edhe kur vdes një papë, në fronin e Shën Pjetrit ulet një tjetër. E
dimë se Zoti do të thërrasë vazhdimisht njerëz të tjerë, që shuajnë etjen e Tij për
dashuri! Por, ndoshta, një Nënë Terezë tjetër nuk do të lindë kurrë më?! Një
lule shqiptare, mbi varrin e Kalkutës, njëherësh me lutjen: “Pushoftë në paqe!”.