Ֆրանսա Իր Մտահոգութիւնը Կը Յայտնէ՝ Սաֆարովի Շնորհուած Ներումին ի Տես ։ Պուտափեշտի
Մէջ Հազարաւոր Հունգարացիներու Ցոյցը Խորհրդարանին Առջեւ։ Թուրքիա։ ՝՝Հաւաքական Խելագարութիւն՝՝
կը Գրէ Թրքական ՌԱՏԻՔԱԼ Թերթը Ազէրպէյճանին Համար ։
Ֆրանսան իր մտահոգութիւնը կը յայտնէ 31 օգոստոսին ազրպէյճանական իշխանութիւններուն կողմէ
Ռամիլ Սաֆարովին ներում շնորհելու վերաբերեալ: ՝՝2006-ին վերջինս հունգարական արդարադատութեան
կողմէ դատապարտուած էր ցմահ բանտարկութեան` 2004 թուականին Պուտափեշտի մէջ հայ սպայի
աներեւակայելի սպանութեան համար», ըսուած է Ֆրանսայի Արտաքին Գործոց Նախարարութեան Մամլոյ
Բանբերի 3 սեպտեմբերի յայտարարութեան մէջ, զոր երէկ տարածեց Հայաստանի մէջ Ֆրանսայի Դեսպանութեան
Մամլոյ բաժանմունքը: Միւս կողմէ հազարաւոր հունգարացիներ երէկ Հունգարիոյ խորհրդարանին
առջեւ ցոյց կատարեցին` բողոքելով Ռամիլ Սաֆարովը Ազրպէյճանին արտայանձնելու հունգարական
կառավարութեան որոշումին դէմ: Իսկ Հունգարիոյ Վարչապետը պատասխանեոով ՝՝թէ արդեօք
հունգարական կողմը ազրպէյճանական իշխանութիւններուն հետ գաղտնի համաձայնութեան եկա՞ծ
է, Վարչապետ Վիքթոր Օրպան ըսած է. «Հունգարիան ժողովրդավար պետութիւն է: Միջազգային չափանիշերը
եւ իրաւունքները չեն հիմնուիր գաղտնի համաձայնութիւններու վրայ»: «Մարդասպան Սաֆարովը
Հերոսացնելը Հաւաքական Խելագարութեան Դրսեւորում » Կը Գրէ Թրքական «Ռատիքալ» Օրաթերթը։
Օրհան Քեմալ Ճենկիզ թրքական «Ռատիքալ» օրաթերթին մէջ կը գրէ, որ «Ազրպէյճան այս օրերս
հաւաքական խելագարութեան մէջ կը թաւալի: (…) Հունգարական դատարանը ցկեանս բանտարկութեան
դատապարտեց Սաֆարովը, սակայն հաւատալով Ազրպէյճանի խոստումներուն, թէ ան պատիժը Ազրպէյճանի
մէջ պիտի շարունակէ կրել, զինք կը յանձնէ Ազրպէյճանին: «Սակայն ի՞նչ պատիժ: Ազրպէյճանի
մէջ Սաֆարովը կ՛ընդունին իբրեւ ազգային հերոս, կը ներեն, կը վերադարձնեն պաշտօնին, տուն
կը նուիրեն, կը վճարեն հաւաքուած աշխատավարձը: Հայ սպան վայրենաբար սպաննած Սաֆարովի
շուրջ կը սկսին հերոսական պատմութիւններ շրջանառութեան դրուիլ: Եթէ ասիկա հաւաքական խելագարութիւն
չէ, ապա ի՞նչ է: Այժմ այս հաւաքական խելագարութեան պատճառով ամբողջ Կովկասը կը սկսի եռալ,
եւ Հայաստանի ու Ազրպէյճանի միջեւ լարուածութիւնը արագ կերպով կ՛աճի»: