Ի Տես Հունգարական-Ազրպէյճանական Գործարարքին Ցասում Եւ Ընդվզում Հայկական Աշխարհի
Մէջ։
Մինչ ցասումն ու ընդվզումը կը պատեն հայոց աշխարհը` ի տես Հունգարիոյ կողմէ մարդասպան
Ռամիլ Սաֆարովի Ազրպէյճանին յանձնման, անդին Ազրպէյճանի պաշտպանութեան նախարար Սաֆար
Ապիեւ գնդապետի կոչում շնորհեց մարդասպանին եւ վերականգնեց անոր պաշտօնը իբրեւ ազրպէյճանական
բանակի սպայ: Ապիեւ ընդունեց Սաֆարովը, շնորհաւորեց զայն հայրենիք վերադառնալու եւ
երկրի նախագահ Իլհամ Ալիեւի կողմէ ներման արժանանալու առիթով, անոր շնորհեց գնդապետի
կոչումը եւ «յաջողութիւն մաղթեց զինուորական մարզին մէջ հետագայ գործունէութեան ընթացքին»: Ռամիլ
Սաֆարով զրուցեց լրագրողներուն հետ: Պատասխանելով այն հարցումին, թէ ի՛նչ կը զգար այն
օրը, երբ սպաննեց Գուրգէն Մարգարեանը, Սաֆարով ըսաւ, որ չի փափաքիր ետ նայիլ եւ վերյիշել
այդ օրը: Հունգարիոյ մէջ Ազրպէյճանի դեսպան Վիլայաթ Կուլիեւ ըսաւ, որ Սաֆարովը Ազրպէյճան
վերադարձնելու խնդիրը մէկ օրուան մէջ չէր լուծուած: «Մենք ամիսներ շարունակ աշխատած ենք
այդ ուղղութեամբ: Յանձնումի հոլովոյթը սկիզբէն մինչեւ վերջ իրականացուած է Ազրպէյճանի
նախագահ Իլհամ Ալիեւի կարգադրութեամբ» ըսաւ դեսպանը: Միւս կողմէ, հունգարական օնլայն
«Էմ. Էն. Օ.» հրատարակութիւնը հրապարակեց Ազրպէյճանի արդարադատութեան նախարարութեան`
Հունգարիոյ արդարադատութեան նախարարութեան ուղղուած պաշտօնական նամակը, որմէ պարզ դարձած
է, որ Ազրպէյճան, փաստօրէն խաբած է Հունգարիան եւ չէ կատարած իր հաւաստիացումները:
15
Օգոստոս թուագրուած նամակին մէջ Ազրպէյճանի արդարադատութեան փոխնախարար Վիլայաթ Զահիրով
նշած է, որ համաձայն իր երկրի քրէական օրէնսգիրքին` ցմահ ազատազրկուածին կարելի է ներում
շնորհել միայն այն պարագային, եթէ ան իր պատիժէն կրած է առնուազն 25 տարին: Միւս կողմէ
Սպիտակ Տունը յայտարարեց, որ Միացեալ Նահանգներու նախագահ Պարաք Օպամա «խորապէս մտահոգուած
է» Ազրպէյճանի նախագահին կողմէ Ռամիլ Սաֆարովին ներում շնորհելու փաստին առնչութեամբ:
Ան ընդգծած է, որ Իլհամ Ալիեւի վճիռը «կը հակասէ շրջանային լարուածութիւնը թուլացնելու
եւ հաշտեցման շարունակական ջանքերը»: Իսկ շաբաթ օր տեղի ունեցաւ բողոքի ցոյց Հայաստանի
արտաքին գործոց նախարարութեան եւ Հայաստանի մէջ Հունգարիոյ հիւպատոսարանին առջեւ: Հրկիզուեցան
հունգարական դրօշակներ: Միջազգային Մամուլին Անդրադարձը Միջազգային բազմաթիւ լրատուամիջոցներ,
ինչպէս` «Նիւ Եորք Թայմզ», «Ուաշինկթըն Փոսթ», «Վոյս աֆ Ամերիքա», «Եուրոնիուզ», «Պի.Պի.Սի.»
եւ ուրիշներ անդրադարձան 2004-ին Պուտափեշտի մէջ հայ սպան կացինով սպաննած ազրպէյճանցի
սպայ Ռամիլ Սաֆարովի ազատ արձակման եւ ատոր յաջորդած բողոքի ցոյցերուն: ԱՖՓ կը գրէ,
որ «հարիւրաւոր մարդիկ բողոքի ցոյց կազմակերպած էին Երեւանի մէջ Հունգարիոյ հիւպատոսարանին
մօտ` բողոքելով հայ զինուորը սպաննած ազրպէյճանցին հայրենիք ուղարկելու քայլին դէմ, ուր
ան անմիջապէս ներում ստացած էր»: «Ռոյթըրզ» կը յիշեցնէ, որ շաբաթ օր Հայաստանի նախագահ
Սերժ Սարգսեան երկրին մէջ գործող դիւանագիտական ներկայացուցչութիւններու ղեկավարներու
հանդիպում ունեցած է եւ յայտնած, որ Հայաստան Հունգարիոյ հետ իր յարաբերութիւնները կասեցուցած
է: «Պի.Պի.Սի.» կը հաղորդէ, որ Ռամիլ Սաֆարովի ազատ արձակումէն ետք Հայաստանի եւ Ազրպէյճանի
միջեւ համացանցային պատերազմ սկսած է: Հայ համակարգչահէնները յաջողած են քանդել Ազրպէյճանի
նախագահի պաշտօնական կայքէջը եւ շարք մը հեղինակաւոր լրատուական ծառայութիւններու կայքէջերը: «Հիւրրիյէթ»
«Ազրպէյճան մէկ զինուորի համար 3 միլիառ տոլար վճարած է» խորագիրով յայտնած է, որ Հայաստանի
պնդումով Ազրպէյճան Հունգարիոյ հետ գաղտնի բանակցութիւններ վարած է եւ Սաֆարովի ազատ
արձակման դիմաց 3 միլիառ տոլար վճարած:
Հունգարացի Գործիչներ Կը Դատապարտեն Կառավարութեան
Արարքը։ Հունգարիոյ նախկին վարչապետ, երեսփոխան Ֆերեց Կիուրչանի շաբաթ օր քննադատած
է Սաֆարովի տեղափոխման առնչութեամբ հունգարական իշխանութեանց որոշումը եւ յայտարարած,
որ խորհրդարանի առաջին նստաշրջանին (սեպտեմբերի երկրորդ աշխատանքային շաբաթ) կառավարութենէն
բացատրութիւն պիտի պահանջէ` ազրպէյճանցի մարդասպանին մասին որոշումին վերաբերեալ: