Рэлігійная тэматыка
працягвае ўздымацца падчас Венецыянскага кінафестывалю. Пасля фільма “Фундаменталіст
паняволі”, паказанага ў першы дзень кінаформа, 1 верасня аматары кіно мелі магчымасць
пазнаёміцца з 21-хвіліннай дакументальнай стужкай італьянскага рэжысёра Ліліаны Кавані
пад назвай “Кларыскі”. Аўтар фільма з шасцю членамі здымачнай групы, здолелі паразмаўляць
з групай кляўзуровых законніц аднаго з італьянскім кляштараў.
У фільме сёстры,
сабраныя разам перад аб’ектывамі двух тэлекамер, імправізавана і шчыра адказваюць
на такія самыя імправізаваныя пытанні аб веры, малітве, уваскрасенні, нават аб адносінах
з мужчынамі. Асабліва на пытанні аб ролі жанчын у Касцёле сёстры адказваюць без дыпламатычнасці
ці замоўчвання некаторых сваіх меркаванняў. Гледачу становіцца відавочна, што над
гэтай тэмай законніцы шмат разважалі і сфармуліравалі дакладную пазіцыю, адзначае
сённяшняя “L’Osservatore Romano”. Паводле іх у Касцёле недаацэньваецца патэнцыял жанчын
і часта іх роля зводзіцца толькі да таго, каб маліцца, але не думаць.