Nunci në Siri: të lutemi e ta përdorim fjalën për të ndalur luftën
Lufta në Siri mund të ketë rezultate të paparashikueshme. Para kësaj katastrofe njerëzore,
politike e humanitare, bota duket e pafuqishme. Grupe rivale, ndërhyrje të të mëdhenjve
të planetit, interesa e plane të panjohura bëjnë të vazhdojë gjakderdhja e të mos
shihet zgjidhje në horizont. Në festën e shën Gjon Kryepremit, nunci apostolik në
Siri, imzot Mario Xenari, së bashku me besimtarë të krishterë e myslimanë, u lut në
xhaminë e madhe të Omajadeve, kur ruhet relikja e kokës së shenjtit, profet i nderuar
nga të tria fetë monoteiste. Ja ç’mendon ai për krizën siriane: Do të thosha
se, në këtë situatë kaq të rëndë, duhet të përdorim edhe një armë të veçantë. Në televizion
shohim armët, që shkatërrojnë e që shkaktojnë tmerre, ndërsa ne të krishterët, madje,
të gjithë besimtarët, kemi një armë të veçantë, atë të lutjes. Para pak ditësh, një
meshtar më thoshte: “U kam thënë të gjithë besimtarëve: në orën 9 e gjysëm të mbrëmjes,
ta fikim televizionin e të lutemi me Rruzaren Shenjte për paqen e pajtimin në Siri”.
Të mos harrojmë ta përdorim këtë armë, e cila është shumë e fuqishme, shumë më tepër
se të tjerat, e shërben për t’i kthyer zemrat, për armëpushimin, për fundin e dhunës
e të tmerreve, që shohim përditë. Lutja është natyrisht, shumë e rëndësishme.
Duke kaluar në planin politik, ç’mund të bëjë më tepër bashkësia ndërkombëtare? Bashkësia
ndërkombëtare duhet të jetë e pranishme. Shohim masakra, gjëra të padurueshme. Bashkësia
ndërkombëtare duhet të hedhë dritë mbi këto plagë, të cilat janë plagë të njerëzimit,
jo vetëm të Sirisë. Prandaj, duhen gjetur përgjegjësit e këtyre tmerreve, me hetime
serioze e të pavarura. Pastaj, duhet impenjim i madh i bashkësisë ndërkombëtare për
t’i ulur armët e për të çliruar fjalën. Fatkeqësisht, u gabua që në fillim: duhej
dhënë liria e fjalës – kjo është armë shumë e frytshme – e duhej luftuar me fjalë,
siç bënë disa vende pranë nesh, si Egjipti, Tunizia. Fjala është arma e debatit, e
konfrontimit për të mos arritur në këtë pikë, ku jemi sot.