Каталіцкія біскупы Канады аб пастырскай місіі

Канферэнцыя Біскупаў Канады абвясціла, што 29-30 верасня ў краіне пройдзе збор сродкаў на падтрымку канадскіх дыяцэзій для пастрыскай місіі. Іерархі ў сваім пасланні падкрэслілі, што гэты збор сродкаў з’ўяляецца добрай нагодай нагадаць вернікам пра шматлікія ініцыятывы, якія каталіцкія святары Канады здзейснілі ў 2011-2012 г. асабліва ў абароне правоў чалавека ў Нігерыі, Егіпце і Іране. Увага была звернута на беднасць у свеце, сацыяльную несправядлівасць, а таксама на ахову навакольнага асяроддзя.

Акрамя таго канадскія біскупы ў пасланні выказалі заклапочанасць тым, што ў шматлікіх краінах свету рэлігія часта зводзіцца да сферы прыватнага жыцця. “Нядаўнія падзеі на міжнародным і нацыянальным узроўнях паказалі пагрозу для свабоды сумлення і веравызнання”, - заявілі іерархі і дадалі, што Каталіцкі Касцёл ім спрыяе і іх абараняе. “ Гэтыя дзве свабоды не нараджаюцца як прывілея з боку дзяржавы і грамадства, але з’яўляюцца натуральнымі і ўсеагульнымі”, - адзначылі біскупы. Яны нагадалі, што рэлігійная свабода з’яўляецца найглыбейшай выявай свабоды сумлення, першым правам на карысць не толькі аднаго чалавека, але мае таксама станоўчыя вынікі для ўсяго грамадства.