Кардынал Пітэр Тарксан,
старшыня Папскай рады “Iustitia et Pax” скіраваў спецыяльнае пасланне да ўдзельнікаў
штогадовага агульнага пасяджэння Рады Канферэнцый біскупаў краін Лацінскай Амерыкі,
што праходзіць у Багаце (Калумбія). “Паўсюдны Касцёл чакае ад лацінаамерыканскіх
католікаў іх канкрэтнага ўкладу ў вырашэнне сённяшніх праблем праз усё большую салідарнасць
з Богам і братамі”, - напісаў кардынал Тарксан і дадаў, што палепшыць ўмовы жыцця
на лацінаамерыканскім кантыненце можна толькі праз адказную фармацыю свецкіх асоб,
а таксама праз спрыянне адукацыі, асабліва моладзі. Гэта важнейшая пастырская праца,
якая можа карэнным чынам перамяніць да лепшага безчалавечныя сітуацыі.
Іерарх
адзначыў, што шматлікія сацыяльныя несправядлівасцші ў Лацінскай Амерыцы прыцямняюць
вобраз Бога. “Новая евангелізацыя павінна прапанваць канкрэтныя сведчанні веры, асабліва
ў дачыненні да ахвяраў гвалту, беднасці, няроўнасці, тых, хто пазбаўлены годнасці
чалавека”.
Іерарх прапанаваў лацінаамерыканскім католікам узяць у рукі энцыкліку
“Pacem in Terris” папы Яна ХХІІІ і жыць паводле яе ўказанняў. “Мір на зямлі, глыбокае
імкненне да яго чалавечых істот ўсіх часоў, можа быць ўстаноўлены і ўмацаваны толькі
ў поўнай павазе да парадку, які ўстанавіў Бог”, - адзначыў кардынал Тарксан.