Benedikti XVI: të kapërcehen paragjykimet, për të kërkuar të vërtetën
Të kërkosh të vërtetën, do të thotë të dëshirosh ta kapërcesh pengesën e vështirë
të paragjykimeve! Na e kujton këtë Ungjilli i festës së sotme, kushtuar Shën Bartolomeut
Apostull, identifikuar me Natanaelin e fragmentit ungjillor. Argument ky, që Papa
e ka prekur shumë herë gjatë katekizmave të tij. Në fjalimin, që do ta kishte mbajtur
në Universitetin romak, La Sapienza, Papa ftonte për kërkimin e mundimshëm të arsyes,
për të arritur kështu, në njohjen e së vërtetës së plotë. Ndërsa paragjykimet janë
përtace e nxitohen përballë së vërtetës, që nuk gjindet lehtë. Kështu Natanaeli i
përgjigjet ashpër Filipit, që ia paraqet Jezusin si Mesi: “Mos prit të mirë nga Nazareti!”.
E kjo ngjarje, na kujton Papa, tregon se shpesh herë njeriu, ndonëse i ndershëm, gënjehet
nga paaftësia e tij për të hyrë në thellësi të çështjeve: “Njëkohësisht, vë
në dukje lirinë e Zotit, që i befason shpresat tona, duke u gjetur pikërisht atje,
ku nuk e presim (Audienca e përgjithshme, 4 tetor 2006). Por Natanaeli,
duke u takuar drejtpërdrejt me Jezusin, preket deri në thellësitë e shpirtit dhe ia
beson gjithë vetveten. Atëherë paragjykimi zhduket: “Dija jonë për Jezusin ka
nevojë, mbi të gjitha, për një përvojë të gjallë: dëshmia e tjetrit, natyrisht, ka
edhe ajo rëndësinë e vet, sepse normalisht e gjithë jeta jonë e krishterë nis me një
kumtim, që vjen deri tek ne përmes veprës së një a më shumë dëshmitarëve. Po duhet
të jemi ne vetë, që hyjmë personalisht në lidhje të fuqishme me Jezusin (Audienca
e përgjithshme, 4 tetor 2006). Kërkimi parashikon udhën. Janë të shumtë ata,
kujton Papa, që u tregojnë udhën të tjerëve, i ftojnë të ecin, ndërsa për vete nuk
bëjnë asnjë hap. Duke u takuar me të rinjtë në Madrid, vitin e kaluar, Benedikti
XVI i pati nxitur: “Është gjë e mirë të jesh gjithnjë në kërkim. Kërkoni, mbi të gjitha,
të vërtetën , që nuk është ide, ideologji, sllogan, por Vetje, është Krishti, vetë
Zoti, që erdhi mes njerëzve”.